काठमाडौँ । नेपाल क्रिकेट संघ (क्यान)ले प्रधानमन्त्री दैवी प्रकोप सहायता कोषका लागि २० लाख सहयोग गरेको छ । क्यानले शनिबार प्रधानमन्त्री दैवी प्रकोप सहायता कोषमा २० लाख सहयोग गरेको जानकारी दिएको छ ।
गत कात्तिक १७ गते जाजरकोट केन्द्रबिन्दु बनाएर भूकम्प गएको थियो । उक्त भूकम्पबाट क्षति पुर्याएपछि पीडितलाई सहयोग गर्न आईसीसी टी–ट्वान्टी विश्वकप २०२४ को एसिया छनोट अन्तर्गत नेपाल र ओमानबीचको फाइनल खेलको टिकट बिक्रीबाट प्राप्त रकमको ५० प्रतिशत प्रधानमन्त्री दैवी प्रकोप सहायता कोषमा जम्मा गर्ने निर्णय गरेको थियो ।
सोहीअनुरुप क्यानले २० लाख सहयोग गरेको हो ।
क्यानका अध्यक्ष चतुरबहादुर चन्द र सचिव पारस खड्काले २० लाख बराबरको चेक प्रधानमन्त्री पुष्पकमल दाहाल प्रचण्डलाई हस्तान्तरण गरेका छन् ।
