एजेन्सी । भारतको बेंगलुरुमा आयोजित एजिस साउथ जोन प्रतियोगितामा हृदयघातका कारण कर्नाटकका पूर्व क्रिकेटर के होयसलाको ३४ वर्षको उमेरमा निधन भएको छ । यो घटना बिहीबारको हो ।
एजिस साउथ जोन प्रतियोगिता अन्तर्गत बिहीबार बेंगलुरुको आरएसआई ग्राउन्डमा तमिलनाडु र कर्नाटकबीच खेल भएको थियो । यो खेलमा कर्नाटकको टोली विजयी भएको थियो । त्यसलगत्तै कर्नाटकका खेलाडीहरूले मैदानमा विजयको उत्सव मनाइरहेका बेला अचानक छाती दुखेपछि होयसला मैदानमै बेहोस भए । मैदानमा रहेका मेडिकल टोलीले तत्काल आकस्मिक उपचार गरिएको थियो, तर होयसलाको शरीरले प्रतिक्रिया गर्न छोडेको थियो ।
त्यसपछि उनलाई थप उपचारका लागि एम्बुलेन्सबाट बोरिङ अस्पताल लगिएको थियो । जहाँ चिकित्सकले होयसलालाई मृत घोषणा गरेका थिए । मृत्युको कारण हृदयघात भएको चिकित्सकहरुले बताएका छन् । होयसलाको आकस्मिक निधनको खबरले दुवै टोलीका खेलाडीमा शोकको लहर छायो ।
