काठमाडौँ । मैत्रीपूर्ण एकदिवसीय सिरिजको तेस्रो तथा निर्णायक खेलमा नेपालको ‘ए’ले क्यानडा–११ लाई जितका लागि एक सय ८२ रनको लक्ष्य दिएको छ ।
मुलपानी क्रिकेट मैदानमा टस हारेर पहिला ब्याटिङको निम्तो पाएको नेपाल ‘ए’ ले ४७ ओभरमा सबै विकेट गुमाएर एक सय ८१ रन बनायो ।
नेपालका लागि ओपनर ब्याट्सम्यान आशुतोष घिरैयाले सर्वाधिक २८ रन बनाए । घिरैया र अर्जुन कुमालले ५४ रनको साझेदारी गरेका थिए । कुमालले ५३ बलमा दुई चौकासहित २७ रन बनाए । बसिर अहमदले २५, सुजन थपलियाले २०, रसिद खानले १९, प्रतिश जिसीले १९, कप्तान सन्दीप जोराले २४ र हेमन्त धामीले ६ रनको योगदान दिए ।
क्यानडाको लागि डिल्लन हेलिगर, निकोलस किर्तन र हर्ष ठाकेरले दुई–दुई विकेट लिए । कलिम साना र साद जाफरले एक–एक विकेट लिए ।
तीन खेलको सिरिजमा हाल १–१ को बराबरीमा छ । आजको खेलमा विजयी हुने टोलीले उपाधि हात पार्नेछ । पहिलो खेलमा क्यानडा–११ ले नेपालको ‘ए’लाई चार विकेटले हराएको थियो । दोस्रो खेलमा भने नेपालको ‘ए’ ले क्यानडा–११ लाई दुई विकेटले हराएको थियो ।
