काठमाडौँ । च्याम्पियन्स लिग फुटबलको अन्तिम १६ को पहिलो लेगमा इंग्लिस क्लब आर्सनल पराजित भएको छ । गएराति भएको खेलमा आर्सनल पोर्चुगिज क्लब एफसी पोर्टोसँग १–० गोलले पराजित भएको हो ।
घरेलु मैदानमा पोर्टोलाई जित दिलाउन एकमात्र गोल गालेनोले गरे । उनले खेल सकिनै लाग्दा अन्तिममा इन्जुरी समयमा गोल गरेका हुन् ।
यस्तै, गएराति नै भएको अर्को खेलमा इटालीयन क्लब नापोली र स्पेनिस क्लब बार्सिलोनाले १–१ गोलको बराबरी खेलेका छन् ।
नापोलीको घरेलु मैदानमा भएको खेलमा ६० औं मिनेटमा रोबर्ट लेवान्डोस्कीले गोल गर्दै बार्सिलोनालाई सुरुवाती अग्रता दिलाएका थिए ।
तर, ७५ औं मिनेटमा भिक्टर ओसिमहेनले गोल गर्दै खेललाई १–१ को बराबरीमा ल्याउँदै नापोलीलाई हारबाट जोगाए ।
अब दोस्रो लेगका खेलहरु आर्सनल र बार्सिलोनाका घरेलु मैदानमा मार्च १३ मा हुनेछन् ।
