काठमाडौँ । प्रधानमन्त्री पुष्पकमल दाहाल प्रचण्डले त्रिभुवन विश्वविद्यालयको उपकुलपति नियुक्त नगरिएको स्पष्ट गर्नुभएको छ ।
प्रधानमन्त्री प्रचण्डसँग भेट्न आज पुगेको गोरखा पत्रकार समाजको प्रतिनिधिमण्डलसँग उहाँले सो धारणा राख्नुभएको हो ।
सञ्चारकर्मीको भिसी नियुक्तिबारेको प्रश्नमा प्रधानमन्त्रीले भन्नुभयो ‘यसमा देवेन्द्रजीले हतार गर्नुभयो, तर भिसी नियुक्ति गरिएको छैन, नियुक्त हुने प्रक्रियामै छ ।
हिजोमात्र माओवादी नेता देवेन्द्र पौडेलले प्राध्यापक डा चित्रबहादुर बुढाथोकी भिसी नियुक्त भएको भन्दै बधाई दिएपछि सोही आधारमा धेरै मिडियामा भिसी नियुक्त भएको समाचार आएको थियो ।
प्रा डा बुढाथोकीलाई तीन जनाको सर्ट लिस्टमा सिफारिस गरिएको छ । शिक्षा मन्त्रीसहितको सिफारिश समितिले उहाँको नाम १ नम्बरमै राखेर सिफारिश गरेकाले उहाँलाई धेरैले सामाजिक सञ्जालमा पनि बधाई दिएका छन् ।
