राजकोट । भारतले राजकोट टेस्टमा कीर्तिमानी ४३४ रनले जित हात पारेको छ । ५५७ रनको लक्ष्यको सामना गरेको इंग्ल्यान्डको टोली चौथो इनिङ्समा १२२ रन मात्रै बनाउन सक्यो ।
रविन्द्र जडेजाले मार्क वुडलाई क्याच आउट गरे, यससँगै टोली अलआउट भयो । जडेजाले ५ विकेट लिए भने पहिलो इनिङ्समा शतक पनि बनाए ।
यो रनको अन्तरले भारतको सबैभन्दा ठूलो जित हो । यसअघि २०२१ मा मुम्बईको वानखेडे मैदानमा टोलीले न्युजिल्यान्डलाई ३७२ रनले हराएको थियो ।
दोस्रो इनिङ्समा भारतका लागि यशस्वी जैसवालले २१४ र शुभमन गिलले ९१ रन बनाए । पहिलो इनिङ्समा रोहित शर्माले १ सय ३१ र रविन्द्र जडेजाले ११२ रन बनाएका थिए । सर्फराज खानले दुवै इनिङमा अर्धशतक बनाए । बलिङमा मोहम्मद सिराजले ४ विकेट लिए ।
इंग्ल्याण्डका बेन डकेटले पहिलो इनिङ्समा १५३ रन बनाएका थिए । उनी बाहेक अन्य कुनै खेलाडीले दुवै इनिङमा अर्धशतक जोड्न सकेनन् । निरञ्जन शाह रंगशालामा भएको पहिलो इनिङ्समा भारतले ४ सय ४५ रन बनाएको थियो भने इंग्ल्याण्डले ३१९ रन बनाएको थियो । भारतले ४३० रनमा दोस्रो इनिङ्स घोषणा गरेको थियो ।
जितसँगै पाँच खेलको सिरिजमा भारतले २–१ को अग्रता लिएको छ ।
