काठमाडौँ । नेपाल क्रिकेट टीम ए ले पहिलो एकदिवसियमा क्यानडा–११ लाई २१७ रनको विजयी लक्ष्य दिएको छ ।
मुलपानी क्रिकेट मैदानमा जारी खेलमा नेपालले पूरा ओभर खेल्दै २१६ रन बनायो । नेपालका लागि बसिर अहमदले सर्वाधिक ५० रन जोडे । बसिरले अन्तिम बलमा अर्धशतक पूरा गरेका थिए । उनले ५५ बलमा ३ चौका र १ छक्का प्रहार गरेका थिए । यस्तै, रशिद खानले ४० रनको योगदान दिए ।
मयन यादवले ५६ बलमा ४ चौका र १ छक्कासहित ३५ रन जोडे । सन्दीप जोराले १४ रन जोडे । साहब आलम २ रनमा नटआउट रहे ।
क्यानडाका लागि कप्तान साद बिन जफरले ३, इश्वरजीत सोधीले २ तथा डिलोन हेलीगर, हर्ष ठाकेर र सहिद अहमदजाईले १–१ विकेट लिए ।
दुई सातापछि यूएईमा आईसीसी विश्वकप लिग–२ त्रिकोणात्मक सिरिज खेल्न जानुअघि क्यानडाले नेपालमा अभ्यास गरेको हो । नेपाल ए को कप्तानी विनोद भण्डारीले गरेका छन् ।
नेपाल ए को प्रशिक्षकमा ज्ञानेन्द्र मल्ल र कलाम अली छन् । दोस्रो खेल मंगलबार र तेस्रो तथा अन्तिम खेल बिहीबार हुनेछ ।
