एजेन्सी । दक्षिण अफ्रिकाका पूर्व खेलाडी तथा प्रशिक्षक माइक प्रोक्टरको ७७ वर्षको उमेरमा निधन भएको छ । प्रोक्टरको निधनले क्रिकेट जगतमा शोकको लहर फैलिएको छ ।
माइक प्रोक्टर दक्षिण अफ्रिकाका उत्कृष्ट अलराउन्डरमध्ये एक थिए । प्रोक्टर रंगभेद पछिको युगमा दक्षिण अफ्रिकाको पहिलो प्रशिक्षक थिए ।
माइक प्रोक्टरले प्रथम श्रेणी क्रिकेटमा उत्कृष्ट प्रदर्शन गरेका छन् । उनले ४०१ प्रथम श्रेणी खेलमा २१ हजार ९३६ रन बनाएका थिए भने १ हजार ४१७ विकेट लिएका थिए ।
७७ वर्षीय प्रोक्टरलाई हृदयघात भएको थियो जसका लागि उनको शल्यक्रिया गरिएको जानकारी प्राप्त भएको छ । शल्यक्रियाका क्रममा केही समस्या आएपछि प्रोक्टरलाई आईसीयूमा भर्ना गर्नुपरेको थियो ।
माइक प्रोक्टरकी पत्नी मारैनाले दक्षिण अफ्रिकी वेबसाइट न्यूज २४ लाई बताइन्, ‘माइक प्रोक्टरलाई हृदयघात भएको थियो, जसका लागि उनको शल्यक्रिया गरिएको थियो । शल्यक्रियाका क्रममा प्रोक्टरलाई केही समस्या आएपछि उनलाई आईसीयूमा भर्ना गरिएको थियो । उनी बेहोस भए र दुर्भाग्यवश फेरि आँखा खोलेनन् ।’
माइक प्रोक्टरको अन्तर्राष्ट्रिय करिअर तीन वर्ष (१९६७–१९७०) सम्म चल्यो । यस अवधिमा उनले सात टेस्ट खेले र तीमध्ये छ वटा जितेका थिए । क्रिकेट जगतमा आफ्नो बलिङ शैलीका कारण चर्चित प्रोक्टरले १५.०२ को औसतमा ४१ विकेट लिएर फ्यानहरूलाई प्रभावित पारे ।
यद्यपि, प्रोक्टरको शानदार अन्तर्राष्ट्रिय करियर सन् १९७० मा रोकियो जब दक्षिण अफ्रिकामा रंगभेदी सरकारद्वारा प्रतिबन्ध लगाइयो । यस अवधिमा दक्षिण अफ्रिकाले कुनै पनि क्रिकेट गतिविधिमा भाग लिन पाएन । प्रोक्टरको अन्तर्राष्ट्रिय करियरको उत्कृष्ट नतिजा नहुन सक्थ्यो, तर उनको प्रथम श्रेणीको नम्बर उत्कृष्ट रहेको छ ।
माइक प्रोक्टरले १६ वर्षसम्म प्रथम श्रेणी क्रिकेट खेले । यसमा, १४ सिजनहरू अंग्रेजी काउन्टीबाट थिए । उनले पाँच वर्ष ग्लुसेस्टरशायर टिमको कप्तानी समेत गरेका थिए । प्रोक्टरले आफ्नो प्रथम श्रेणी करियरमा ४८ शतक र १०९ अर्धशतक प्रहार गरेका थिए । माइक प्रोक्टर दक्षिण अफ्रिकाको क्रिकेट इतिहासमा घरेलु सिजनमा ५०० रन र ५० विकेट लिने एकमात्र खेलाडी हुन् ।
