एजेन्सी । एमआई इमिरेट्सले पहिलो पटक इन्टरनेशनल लिग (आईएलटी–२०) को उपाधि जितेको छ । फाइनल खेलमा एमआई इमिरेट्सले दुबई क्यापिटल्सलाई ४५ रनले पराजित गर्यो ।
शनिबार दुबईमा भएको फाइनल खेलमा दुबई क्यापिटल्सले टस जितेर बलिङ रोजेको थियो । ब्याटिङ गर्दै एमआई इमिरेट्सले २० ओभरमा ३ विकेट गुमाएर २०८ रन बनाएको थियो । जवाफमा दुबईले २० ओभरमा ७ विकेट गुमाएर १६३ रन मात्रै बनायो ।
इमिरेट्सका कप्तान निकोलस पूरन र आन्द्रे फ्लेचरले अर्धशतक बनाए । विजयकान्त विकान्त र ट्रेन्ट बोल्टले २–२ विकेट लिए ।
इमिरेट्सका लागि मोहम्मद वासिम र कुसल परेराले ओपनिङ गरेका थिए । वासिम ४३ रन बनाएर आउट भए भने परेरा ३८ रन बनाएर आउट भए । यसपछि आन्द्रे फ्लेचर आए र ५३ रनको इनिङ खेले । निकोलस पुरनले उनलाई साथ दिए । यी दुईबीच ५६ रनको साझेदारी भयो ।
फ्लेचरपछि केरोन पोलार्ड आएर पूरनलाई सपोर्ट गरे । पूरन बिस्तारै खेल्दै थिए, उनले १५ बलमा १८ रन मात्र बनाए तर डेथ ओभरमा १२ बलमा ३९ रन बनाए । योसँगै पूरनले कुल ५७ रन बनाए र अविजित रहे । पोलार्ड पनि ९ रन बनाएर अविजित रहे ।
दुबईका लागि जेसन होल्डर, सिकन्दर रजा र जाहिर खानले १–१ विकेट लिए ।
दुबई क्यापिटल्सले ठूलो साझेदारी बनाउन सकेन । ओपनिङमा आएका लुक डु प्लोय शून्य रन बनाएर आउट भए । योसँगै तेस्रो नम्बरमा रहेका टम एबेलले पनि १४ रन मात्र बनाउन सके । अर्को छेउमा टम ब्यान्टन र कप्तान साम बिलिङ्सबीच सर्वाधिक ३८ रनको साझेदारी भयो ।
ब्यान्टन ३५ रन बनाएर र बिलिङ्स ४० रन बनाएर आउट भए । बिलिङ्सले इनिङ्सको सबैभन्दा ठूलो स्कोर बनाए । यो साझेदारी टुटेपछि इनिङ्स खस्कियो । रोभम्यान पावेल ८ रन बनाएर आउट भए भने जेसन होल्डर २४ रन बनाएर आउट भए ।
अन्त्यमा स्कट कागेलजिन १९ रन र राहुल चोपडा १ रनमा अविजित रहे ।
यस पटक विजेताले ७ लाख अमेरिकी डलर पुरस्कार प्राप्त गर्नेछन् भने उपविजेताले करिब ३ लाख अमेरिकी डलर पाउनेछन् ।
यो एक फ्रेन्चाइज आधारित टी–२० लिगग हो, जुन इमिरेट्स क्रिकेट बोर्डद्वारा आयोजित गरिन्छ । लिगमा ६ फ्रेन्चाइजी टोली सहभागी छन् । पहिलो सिजनको उपाधि गल्फ जायन्ट्सले जितेको थियो । जहाँ, यस वर्ष एमआई इमिरेट्सले उपाधि कब्जा गर्यो ।
