भैरहवा । सहकारीका बचतकर्ताको रकम हिनामिना गरेको आरोपमा बुटवलको सुप्रिम बचत तथा ऋण सहकारी संस्थाका अध्यक्ष पक्राउ परेका छन् ।
एक अर्ब रुपैयाँभन्दा बढी रकम हिनामिना गरेको आरोपमा सहकारीका अध्यक्ष ओमप्रकाश गुरुङ र भैरहवा शाखाका व्यवस्थापन दुर्गा चापागाई पाण्डेयलाई प्रहरीले भैरहवाबाट पक्राउ गरेको हो ।
लुम्बिनी प्रदेशको सहकारी रजिस्ट्रार कार्यालयको प्रतिवेदन र बचतकर्ताको उजुरीपछि अध्यक्ष गुरूङ र व्यवस्थापक पाण्डेयलाई पक्राउ गरिएको प्रहरीले जनाएको छ ।
सुप्रिम सहकारीका संस्थापक अध्यक्ष एवम् संरक्षक गितेन्द्रबहादुर (जिबी) राई भने एक वर्षदेखि सम्पर्कविहीन छन् । उनलाई विभिन्न जिल्लाका १० हजार ३९१ जना बचतकर्ताको १ अर्ब ७ करोड ८२ लाख ६७ हजार ७२९ रूपैयाँ हिनामिनाको आरोप लाग्दै आएको छ ।
सहकारीले राई अध्यक्ष तथा सञ्चालक रहेका विभिन्न पाँचवटा कम्पनीलाई ७८ करोड ५० लाख ७६ हजार ६६५ रूपैयाँ ऋण दिएको थियो ।
