काठमाडौँ । चितवनको भरतपुरमा निर्माणधिन गौतमबुद्ध क्रिकेट रंगशालाको निर्माण सम्पन्न गर्नका लागि बागमती प्रदेशले ७० प्रतिशत बजेट दिने निर्णय गरेको छ ।
आज बसेको बागमती प्रदेशको मन्त्रिपरिषद बैठकले रंगशाला निर्माणको प्रथम चरणका लागि ७५ करोड रुपेयाँ बराबर लागत अनुमानको ७० प्रतिशत प्रदेश सरकारले बेहोर्ने निर्णय गरेको हो ।
धुर्मुस–सुन्तली फाउण्डेसनले १९ करोड रुपैयाँ ऋण लागेको भन्दै दुई वर्षअघि रंगशाला निर्माणको काम छाडेको थियो । त्यसपछि रंगशाला निर्माण कार्य अलपत्र बनेको छ ।
यसअघि सङ्घीय सरकारले बागमती प्रदेश सरकारसँगको साझेदारीमा रङ्गशाला बनाउन भरतपुर महानगरपालिकालाई सहमति दिएको थियो । पुषमा बसेको सङ्घीय सरकारको मन्त्रिपरिषद् बैठकले राष्ट्रिय गौरवको आयोजनाका रूपमा रहेको र लिज ऐनअन्तर्गत रङ्गशालाले जग्गा लिनुपर्ने भएकाले सहमति लिन भनिएको थियो । प्रदेशको सहमतिसँगै अब रङ्गशाला तीन तहका सरकारको संयुक्त लगानीमा बन्ने भएको हो ।
प्रदेश सरकारले ७० प्रतिशत लगानी गरेसँगै रकम अभाव भए सङ्घीय सरकारको अनुदान लिएर महानगरपालिकाले थप गरी रङ्गशाला बनाउने तयारी गरिएको भरतपूर महानगरपालिकाका प्रमुख रेनु दाहालले बताईन् ।
त्रिभुवन विश्वविद्यालय र कृषि तथा वन विज्ञान विश्वविद्यालयसँग महानगरपालिकाले जग्गाको सम्झौता गरी रंगशालाको काम अघि बढाउदैछ। रंगशाला निर्माणको पहिलो चरणमा खेलमैदान र प्यारापिटलगायतका काम सम्पन्न गरेर खेल खेल्न मिल्ने बनाइनेछ ।
