एजेन्सी । दक्षिण अफ्रिकाको अनुभवविहीन टोली न्युजिल्यान्डविरुद्ध कतै पनि टिक्ने देखिँदैन । न्युजिल्यान्डले माउन्ट मङ्गनुईस्थित बे ओभल मैदानमा पूर्ण रूपमा वर्चस्व कायम गरेको छ । पहिलो टेष्टको दोस्रो दिन सोमबार चिया ब्रेकसम्म न्युजिल्यान्डले ७ विकेट गुमाएर ४७५ रन बनाएको छ ।
न्युजिल्याण्डका रचिन रविन्द्रले दोहोरो शतक प्रहार गरे, उनी २४० रन बनाएर आउट भए । केन विलियम्सनले पनि शतक प्रहार गरे, उनी ११८ रन बनाएर आउट भए । दक्षिण अफ्रिकाका कप्तान निल ब्रान्डले ३ तथा रुआन डी स्वार्टले २ विकेट लिए ।
दोस्रो दिनको पहिलो इनिङ्समा न्युजिल्यान्डले २ सय ५८ रन बनाएको थियो । विलियम्सनले ११२ रन र रचिनले ११८ रन बनाएर खेल्न थाले । विलियम्सनले आफ्नो स्कोरमा खासै रन जोड्न सकेनन् र ११८ रन बनाएर डि स्वार्टको शिकार बने । योसँगै उनी र रचिनबीचको तेस्रो विकेटमा २३२ रनको साझेदारी टुट्यो ।
विलियम्सनको विकेटपछि डेरिल मिचेल र रचिनबीच शतकीय साझेदारी भयो । मिचेल ३४ रन बनाएर आउट भए र दुईबीचको १०३ रनको साझेदारी टुट्यो । विकेटकिपर टम ब्लन्डेल पनि ११ रन बनाएर आउट भए र टोलीले ३९१ रनको स्कोरमा ५ विकेट गुमाएको थियो ।
५ विकेट खसेपछि पनि रचिनले आफ्नो पकडलाई कायम राखे । उनले दोहोरो शतक प्रहार गर्दै टोलीको स्कोर ४०० रनभन्दा माथि पुर्याएका थिए । उनले ग्लेन फिलिप्ससँग ८२ रनको साझेदारी गरे । फिलिप्स ३९ रन बनाएर आउट भए र दुईबीचको साझेदारी टुट्यो ।
रचिन पनि ३६६ बलमा २४० रन बनाएर आउट भए । उनलाई निल ब्रान्डले बोल्ड गरेका थिए । ब्रान्डले फिलिप्स र मिचेललाई पनि आउट पारे ।
