काठमाडौँ । भारत एएफसी एसियन कप २०२३ बाट बाहिरिएको छ । मंगलबार कतारको अल बेट रंगशालामा भएको समूहको तेस्रो खेलमा सिरियाले भारतलाई १–० गोल अन्तरले पराजित गरेको हो ।
खेलको एकमात्र गोल सिरियाका ओमार क्रिबिनले ७६ औं मिनेटमा गरेका थिए ।
भारतले प्रतियोगितामा एक गोल पनि गर्न सकेन र तीनवटै खेलमा हार बेहोरेको थियो । भारतीय टोली अस्ट्रेलियासँग २–०, उज्वेकिस्तानसँग ३–० र सिरियासँग १–० ले पराजित भएको हो ।
सिरियाको भने नकआउट पुग्ने आशा जिवितै छ । प्रतियोगिताको यस संस्करणमा सहभागी २४ टोलीमध्ये प्रत्येक समूहबाट शीर्ष दुई टोली र उत्कृष्ट तेस्रो हुने चार टोली नकआउटका लागि छनोट हुनेछन् । सिरियाले समूह ई र समूह एफको नतिजा पर्खनुपर्नेछ ।
