काठमाडौंः नेपालस्थित पाकिस्तानी राजदूतावासद्वारा आयोजित छैटौं नेपाल–पाकिस्तान मैत्रीपूर्ण टी२० क्रिकेट प्रतियोगिता सम्पन्न भएको छ ।
दश दिने उक्त प्रतियोगितामा १२ वटा क्रिकेट क्लबको सहभागिता थियो ।
ग्रट हिमालयन क्रिकेट क्लबले प्रतियोगिताको उपाधि जितेको थियो भने एन्जेल्स क्रिकेट क्लब दोस्रो भयो । प्रतियोगितामा विजयी टिमलाई युवा तथा खेलकूद सचिव केदार न्यौपानेले पुरस्कार एवं ट्रफी प्रदान गर्नु भएको थियो ।
पुरस्कार वितरण समारोहमा विशेष अतिथिका रुपमा नेपालको अन्तर्राष्ट्रिय क्रिकेट टिमका कप्तान ज्ञानेन्द्र मल्ल उपस्थित हुनुहुन्थ्यो ।
समारोहमा सम्बोधन गर्दै सचिव न्यौपानेले पाकिस्तानी राजदूतावासले खेल मार्फत नेपाल र पाकिस्तानबीचको मैत्रीपूर्ण सम्बन्ध थप सुदृढ र सुमधुर बनाउन गरेको प्रयास स्मरणीय रहेको बताउनुभयो ।
नेपालस्थित पाकिस्तानी राजदूत सइद हैदरले दुई देशका युवालाई एकै ठाउँमा ल्याउने प्रयासलाई निरन्तरता दिने प्रतिबद्धता व्यक्त गर्नुभयो । उहाँले खेलकुद जस्ता कार्यक्रमले जनस्तरको सम्बन्धलाई थप मजबूत बनाउन सघाउने बताउनुभयो ।
