काठमाडौं । प्रधानमन्त्री कप एकदिवसीय राष्ट्रिय प्रतियोगितामा नेपाल पुलिस क्लबले कोशी प्रदेशलाई ७ विकेटले पराजित गरेको छ । यो पुलिसको लगातार दोस्रो जित हो भने कोशीले तेस्रो हार बटुल्यो।
जितको लागि १ सय ६७ रनको मध्यम विजयी लक्ष्य पाएको पुलिसले २३.१ ओभरमा ३ विकेट गुमाउँदै पूरा गर्यो । पुलिसको जितमा अर्जुन साउदले अर्धशतक बनाए । उनी ६३ बलमा ५ चौका र २ छक्कासहित ६२ रनमा नट आउट रहे ।
यस्तै, कप्तान दीपेन्द्रसिंह ऐरी ३८ रनमा नट आउट रहँदा दीलिप नाथले ३१, कुशल भुर्तेल १२ र सुनिल धमलाले १६ रन बनाए ।
कोशीको लागि कमल खत्रीले २ विकेट लिए भने सोनु मण्डलले १ विकेट ढाँले ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको कोशी ४८.२ ओभरमा अलआउट हुँदै १ सय ६६ रन बनाएको थियो । कोशीको लागि सुजन थपलियाले सानदार शतकीय इनिङ खेलेपनि जितको लागि पर्याप्त हुन सकेन । थपलियाले १ सय २६ बलमा ६ चौका र ८ छक्कासहित १ सय ५ रन बनाए ।
सुजन बाहेक कोशीका अन्य कुनै ब्याटरले राम्रो खेल्न सकेनन् । ३७–२ को अवस्थाबाट लगातार विकेट गुमाउँदा कोशी २४.३ ओभरमा ६४–७ को अवस्थामा पुगेको थियो । त्यसपछि अभ्यास तिमिशिनाले आठौं विकेटका लागि सुजनसँग ९९ रनको साझेदारी गरेका थिए । अभ्यासले २३ रन बनाए । अंकित सुवेदी १०, मिनाश थापा २ र फिर्दोस अन्सारी ९ रनमा आउट भए ।
पुलिसको लागि करण केसीले ३ विकेट लिए । ललित राजवंशी र सुनिल धमलाले २–२ विकेट लिदा कुशल भुर्तेल, सागर ढकाल र राशिद खानले १–१ विकेट लिए ।
कोशीले बिहीबार आर्मीसँग र पुलिसले आइतबार भैरहवामा गएर आर्मीसँग खेल्नेछ ।
