२२ पुष २०८१, सोमबार
,
Latest
दक्षिण अफ्रिका १० विकेटले विजयी पूर्वनगरप्रमुख शिवाकोटी पुर्पक्षका लागि कारागार चलान सवारी साधनको भाडादर तीन दशमलव ३० प्रतिशत वृद्धि (रेट सहित) कुलमानलाई कारबाहीको अर्को प्रयास, ऊर्जा मन्त्रालयले सोध्यो स्पष्टीकरण आयात प्रतिस्थापन तथा निर्यात प्रर्वद्धनका लागि सरकारले ठोस कदम चाल्नुपर्छ: अध्यक्ष ढकाल गोरखा राज्यका विसर्जकलाई किन चिन्ने ? एमाले केन्द्रीय कमिटी बैठक भोलि पनि बस्ने ‘लङ डिस्ट्यान्स रिलेशनसिप’लाई बलियो बनाउन चाहनुहुन्छ भने भुलेर पनि नगर्नुहोस् यी ५ गल्ती खराब समय चलिरहेको छ भने पर्समा राख्नुहोस् यी ३ चिज पुरूषहरुले सुधार्नै पर्ने सात बानीहरु
तपाईं के खोज्दै हुनुहुन्छ ?

पृथ्वीजयन्ती राजकीय रुपमा मनाउन र पृथ्वीनारायण शाहको तस्बिर नेपाली नोटमा अंकित गर्न कमल थापाको माग



अ+ अ-

काठमाडौँ । राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले राष्ट्रिय प्रजातन्त्र पार्टीसँग आफ्नो पार्टीको एकता हुँदैमा मुलुकमा राजसंस्था पुनस्र्थापना हुन नसक्ने बताउनुभएको छ ।

पूर्वउपप्रधानमन्त्री समेत रहनुभएका अध्यक्ष थापाले सबै देशभक्त, प्रजातान्त्रिक शक्तिहरु बीचको वृहत मोर्चा बनाएर मात्रै मुलुकमा राजसंस्था र हिन्दु राष्ट्र पुनस्र्थापना गर्न सकिने बताउनुभएको हो । २०३ औं पृथ्वीजयन्ती एवं राष्ट्रिय एकता दिवसको अवसर पारेर शुक्रवार पार्टीले काठमाडौंमा आयोजना गरेको चियापान कार्यक्रममा बोल्दै उहाँले राजादेखि माओवादीसम्म अटाउने राजनीतिक प्रणालीको विकास गर्न पनि सबै राजनीतिक दलहरुलाई आग्रह गर्नुभयो ।

कसैलाई पनि निषेध नगर्ने खालको राजनीतिक प्रणालीको विकास गर्न सकेमात्रै मुलुकमा शान्ति, राजनीतिक स्थायित्व र आर्थिक विकास सम्भव हुने अध्यक्ष थापाको भनाई थियो । उहाँले पृथ्वीनारायण शाहको योगदान कुनै संस्था वा राजनीतिक व्यवस्थासँग मात्रै सम्बन्धित नभएकाले त्यस रुपमा हेर्न नहुने पनि बताउनु भयो । थापाले राष्ट्र निर्माता पृथ्वीनारायण शाहको जन्मजयन्तीलाई राजकीय रुपमा मनाउन र उहाँको तस्बिर नेपाली नोटमा अंकित गर्न पनि सरकारसँग माग गर्नुभयो ।

उहाँले भन्नुभयो, ‘जहाँसम्म हिन्दु राष्ट्र र राजसंस्था पुनस्र्थापना गर्ने कुरा छ । यो केवल राप्रपा वा राप्रपा नेपाल मात्रै मिलेर पनि हुँदैन । यो त सबै राष्टवादी, प्रजातान्त्रिक, देशभक्त शक्तिहरुको बीचमा एकता र एउटा वृहत मोर्चाको आवश्यकता पर्दछ । र, वास्तवमा आजको दिन राष्ट्रिय एकता दिवसको दिन म सबै राजनीतिक दलहरुलाई विशेष रुपले आग्रह गर्न चाहन्छु कि हामीले कसैलाई पनि निषेध नगरौं । राजादेखि माओवादीसम्म सबै अटाउने राजनीतिक प्रणालीको विकास गर्ने र सबै नेपाली मिलेर देशमा शान्ति, स्थायित्व कायम गर्ने र देशको समग्र आर्थिक विकास गर्ने दिशामा आजको दिनले प्रेरणा देओस् भन्ने म कामना पनि गर्न चाहन्छु ।

पृथ्वीनारायण शाहको योेगदान कुनै राजनीतिक व्यवस्था वा संस्थासँग मात्रै सम्बन्धित छैन । समय, काल र परिस्थिति अनुसार राजनीतिक व्यवस्था परिवर्तन हुँदै जान्छ । तर नेपाली पहिचान, नेपाली नाम, जुन पृथ्वीनारायण शाहले हामीलाई दिनुभयो । त्यो कहिल्यै पनि समाप्त हुने कुरा होइन । नेपाल रहिरहेसम्म राष्ट्र निर्माताको योगदान सदैव अविष्मरणीय रहनेछ । यो वास्तविकतालाई बुझेर सिंगो राज्यले नै पृथ्वीनारायण शाहको योगदानको संस्मरण गर्नुपर्दछ । राजकीय स्तरबाटै सम्मान समारोहको आयोजना गर्नुपर्छ भन्ने हाम्रो माग रहेको छ । वास्तवमा विगतमा पृथ्वी जयन्ति राष्टिय एकता दिवस धुमधामका साथ मनाइन्थ्यो । २०६३ सालपछि त्यो अवरुद्ध हुन गयो । २०७४ सालमा तत्कालीन प्रधानमन्त्री शेरबहादुर देउवाको कार्यकालमा, जहाँ हामी उपप्रधानमन्त्रीको रुपमा सहभागी थियौं ।

हाम्रै प्रयासमा पृथ्वी जयन्तीलाई राष्ट्रले समारोहको रुपमा मनाउने सार्वजनिक बिदा दिने निर्णय गरेको थियो । तर त्यसपछि फेरि त्यो परम्परालाई कटौति गरियो । यो वर्ष वर्तमान सरकारले पृथ्वीजयन्ती राष्टिय एकता दिवसको रुपमा मनाउन सार्वजनिक विदा दिएको छ । यसको म स्वागत गर्न चाहन्छु । र, साथसाथै सरकारसँग के पनि आग्रह गर्न चाहन्छु भने राष्ट्र निर्माताको सम्मान गर्दै नेपाली नोटमा पृथ्वीनारायण शाहको तस्बिर अंकित गर्ने र साथसाथै केवल सार्वजनिक बिदा दिने मात्रै होइन, भव्य रुपमा राष्ट्रिय एकता दिवस सरकारी स्तरबाटै पनि मनाइनुपर्दछ भन्ने मेरो आग्रह छ । र म फेरि पनि सबै राजनीतिक दलहरु, वर्तमान सरकार र नेतृत्व वर्गसँग आग्रह गर्न चाहन्छु कि हामीले पृथ्वी नारायण शाहको योगदानलाई कुनै संस्था र व्यवस्थासँग गाँसेर नहेरौं । आज हामीले जुन नेपाली भन्ने नाम पाएका छौं ।

जसको कारणले गर्दाखेरी विश्व रंगमञ्चमा नेपालको गौरव रहेको छ । नेपालको शान रहेको छ । यो सबै पृथ्वीनारायण शाहले सुरु गरिदिएको कारणले हो । पृथ्वीनारायण शाहले नेपालको एकीकरण नगरिदिएको भए अहिले हाम्रो नेपालको अस्तित्व पनि रहने थिएन । भारतको कुनै एउटा अंगको रुपमा रहन सक्ने सम्भावना थियो । यो एउटा इतिहासलाई हामीले सम्मान गर्दै पृथ्वी जयन्तिलाई एउटा भव्य रुपमा मनाउनु पर्छ भन्ने हाम्रो धारणा हो । र, त्यही रुपमा हामीले मनाई राखेका छौं ।’

अध्यक्ष थापाले पृथ्वीजयन्ती नेपालको गौरव र शानसँग सम्बन्धित भएको दाबी गर्दै यसलाई राजकीय सम्मानका साथ बनाउनुपर्ने तर्क समेत गर्नुभयो ।