काठमाडौं । चर्चित कथावाचिका राधिका दासीले आफ्नो व्यक्तिगत प्रतिष्ठा, सामाजिक छवि र धार्मिक पहिचानमाथि प्रहार भएको भन्दै घटनाको स्वतन्त्र, निष्पक्ष र पारदर्शी छानबिन गर्न सरकारसँग माग गरेकी छन्।
मंगलबार जारी गरेको प्रेस वक्तव्यमा उनले आफू आध्यात्मिक साधना, भक्ति, सेवा र नैतिक मूल्यमा समर्पित जीवन बिताउँदै आएको उल्लेख गर्दै आफ्नो सम्मान र मानवीय गरिमामाथि चोट पुगेकाले बाध्य भएर सार्वजनिक रूपमा न्यायको माग गर्नुपरेको बताएकी छन्। यो कुनै राजनीतिक वा प्रतिशोधपूर्ण कदम नभई एक पीडित नागरिकको रूपमा न्याय खोज्ने प्रयास भएको उनको भनाइ छ।
दासीले पछिल्लो समय आफ्नो चरित्र र प्रतिष्ठामा आँच पुग्ने सामग्रीहरू फैलाइएकाले परिवार, शुभेच्छुक तथा श्रद्धालुहरू गहिरो रूपमा प्रभावित भएको उल्लेख गरेकी छन्। अभिव्यक्ति स्वतन्त्रताको नाममा कसैको चरित्रहत्या गर्न नपाइने भन्दै महिलाको सम्मानमाथिको आक्रमण समग्र समाजको आत्मसम्मानमाथिको आक्रमण भएको उनको भनाइ छ।
प्रेस वक्तव्यमा उनले न्यायको खोजीका क्रममा सम्बन्धित सरकारी निकाय तथा गृहमन्त्रीसँग भेट्ने प्रयास गरे पनि लामो समय प्रतीक्षापछि पनि भेट्न नपाएको गुनासो गरेकी छन्। पीडित नागरिकको रूपमा आफ्नो कुरा सुनिदिन र निष्पक्ष न्याय सुनिश्चित गरिदिन सरकारसँग आग्रह गरेकी छन्।
दासीले नेपालको संविधान र न्यायपालिकाप्रति पूर्ण विश्वास व्यक्त गर्दै साइबर ब्युरोलगायत सम्बन्धित निकायमा उजुरी दर्ता गरिसकेको जानकारी दिएकी छन्। कानून निष्पक्ष रूपमा कार्यान्वयन भए सत्य अवश्य स्थापित हुने विश्वास उनले व्यक्त गरेकी छन्।
प्रेस वक्तव्यमार्फत उनले घटनाको स्वतन्त्र र पारदर्शी अनुसन्धान, अनुसन्धानमा प्रभाव वा हस्तक्षेप भएको भए त्यसको छानबिन, दोषीलाई कानूनबमोजिम कारबाही, पीडितको सम्मान र गोपनीयताको संरक्षण, साइबर माध्यमबाट हुने मानहानि तथा चरित्रहत्या रोक्न प्रभावकारी कार्ययोजना लागू गर्नुपर्ने लगायत आठ बुँदे माग अघि सारेकी छन्।
उनले सञ्चार माध्यमलाई सत्य, प्रमाण र जिम्मेवार पत्रकारिताको पक्षमा उभिन आग्रह गर्दै आम नागरिकलाई सामाजिक सञ्जालमा अपुष्ट सूचना तथा घृणाजन्य सामग्री साझा नगर्न र भीडको निर्णयभन्दा कानूनी प्रक्रियामा विश्वास गर्न अनुरोध गरेकी छन्।
