काठमाडौं । काठमाडौंको कमलादीस्थितमा रहेको वन्डर्स नेपालले आईपीओ जारी गर्ने भएको छ । पुस २५ गते सम्पन्न कम्पनीको छैटौं वार्षिक साधारण सभाले कम्पनीलाई पब्लिक लिमिटेडमा परिवर्तन गरि आईपीओ जारी गर्ने प्रस्तावलाई सर्वसम्मत पारित गरेको हो ।
कम्पनीकै रजिष्टर्ड कार्यालय स्काईवाक नेपाल कमलादी परिसरमा सम्पन्न उक्त सभाले आर्थिक वर्ष ०७९/८० को वित्तीय विवरण पारित गरेको छ । सभाले आगामी योजनाहरु समेत पारित गर्ने संञ्चालमा आएका र तयार हुदै गरेका परियोजनाहरुका बारेमा पनि गहन समिक्षा गरेको छ ।
वन्डर्स नेपालका प्रमुख कार्यकारी अधिकृत नविन भण्डारीका अनुसार असार १५ गते देखी टावर संञ्चालनमा आएको र पुस २४ गते सम्ममा करिब ७६ हजार व्यक्तिले टाबर चढेका छन् ।
पछिल्ला दिन आन्तरिक संगै भारतीय पर्यटकहरुको संख्यामा पनि उल्लेख्य रुपमा बृद्धि भएको जानकारी गराउदै उहाँले भन्नुभयो ‘यो क्षेत्र बिस्तारै उपत्यकाको एक प्रमुख पर्यटककिय गन्तव्य बन्दै गएको छ ।’
आगामी फाल्गनु बाट बिभिन्न फुड कोर्ट सहित सिटी बन्जी जम्प लगायत थप साहसिक गतिविधि विस्तार गरि सेवाको दायरा फराकिलो बनाउदै लैजाने कम्पनीले जनाएको छ । वन्डर्स नेपालका परियोजना निर्देशक ई सञ्जिब रोक्काले टावर आई एस ओ बाट प्रमाणीकरण भएको र माहानगरभित्र धेरै कर बुझाउने संस्थामा रुपमा रहेको छ।
साढे १३ रोपनी जग्गामा फैलिएको ७८.५ मिटर अर्थात २५७.५ फिट उचाइको टावरको सबैभन्दा माथिको भागबाट ३६० डिग्रीमा काठमाडौँ नियाल्न सकिन्छ ।
स्काई टावरको लिफ्ट ग्राउण्ड फ्लोरबाट सिधै ६८ मिटरमा मात्र रोकिनेछ । टावरमा फुडकोर्ड मिटिङ हललगायतका क्षेत्र रहेका छन् । टावरको सबैभन्दा माथि स्काई वाक रहेको छ जहाँ पूर्ण पारदर्शी सिसा संरचनामा पदयात्रा गर्न सकिने छ ।
दुई हजार स्क्वायर फिट मा स्काई वाक गर्न सकिने छ भने सुरक्षाका लागि वरिपरि ६ फिट अग्लो ग्लासको रेलिङ राखिएको छ । टावरको ७५ मिटर उचाइमा सिसामाथि हिँड्दा अवलोकनकर्तालाई आकाशमा हिँडेको जस्तै अनुभूति हुने निर्माण कम्पनीले जनाएको छ ।
कम्पनीका अनुसार ‘आकाशमा हिँडेको अनुभूति गराउनलाई सिसामा टेकेर हिँडनलाई १० एमएमको टेमपड ग्लास, १.२ को ल्यामिनेटिङ लेयर, फेरी १० एमएमको ग्लास, १.२ एमएम एसटिपी र १० एमएमको ग्लास गरेर ५ वटा लेयरमा निर्माण गरिएको छ । जसलाई हेम्मरले फुटाउँदा पनि तल र माथि फुट्दैन बीचमा मात्रै फुट्ने गर्छ । केही कतै त्यस्तो हुन गएरमा स्टकमा ग्लास रहेको छ ।’
टावरको सबैभन्दा माथि एकै पटक ५ सय जनासम्म रहन सक्नेछन् । स्टिल स्ट्रक्चरमा निर्माण भएको यो टावर निकै आकर्षक र मनमोहक देखिन्छ । कम्पनीका अनुसार टावरमा इभेन्टहरु पनि गर्न सकिने छ ।
साथै टावर परिसरमा बगैँचा, फुडकोर्ट तथा विभिन्न व्यापारिक केन्द्रहरु रहने गरी ३६ ओटा भन्दा बढी सटरहरु निर्माण भएका छन् ।
