काठमाडौँ । सत्ताधारी गठबन्धन दलबीच राष्ट्रियसभाको १९ वटै सिटमा भागबन्डा मिलेको छ । प्रधानमन्त्री निवास बालुवाटारमा आइतबार बसेको सत्ताधारी गठबन्धनको बैठकमा उक्त सहमति भएको हो ।
सहमतिअनुसार नेपाली कांग्रेसले १०, नेकपा (माओवादी केन्द्र) ले ६, नेकपा (एकीकृत समाजवादी) ले २ र जनता समाजवादी पार्टीले १ सिट पाउने भएका छन् । एउटा राष्ट्रपतिले मनोनित गर्ने सिटमा भने राष्ट्रिय जनमोर्चालाई दिने सहमति भएको छ । उक्त सिटमा जनमोर्चाले उपाध्यक्ष दुर्गा पौडेललाई उठाउने भएको छ ।
नेपाली कांग्रेसका प्रमुख सचेतक रमेश लेखकका अनुसार कहाँ कसले उम्मेदवारी दिने भन्नेबारेमा पनि करिब टुंगो लागिसकेको छ । उहाँका अनुसार संख्यामा कुरा मिलेको र कहाँ कसले उम्मेदवारी दिने भन्ने पनि लगभग टुंगो लागेको छ, । बाँकी पनि अब केही बेरमा टुंगो लाग्ने उहाँले बताउनुभयो ।
यद्यपि बैठकमा मोटामोटी ढंगले सहमति भएकाले केही सिट यताउता हुनसक्ने संकेत गर्नुभयो । राष्ट्रियसभामा बागमतीबाट ४, गण्डकी, कर्णाली र सुदूरपश्चिमबाट ३/३ गरी ९, कोशी, मधेश र लुम्बिनीबाट २/२ गरी ६ समेत १९ सीटका लागि निर्वाचन हुँदैछ ।
कांग्रेसले पाएका १० सीटमा बागमती, गण्डकी र सुदूरपश्चिममा २/२ गरी ६ तथा कोशी, मधेश, लुम्बिनी र कर्णालीमा १/१ सीट रहेका छन् ।
माओवादीको भागमा कोशी, बागमती, गण्डकी, लुम्बिनी, कर्णालीमा र सुदूरपश्चिममा १/१ गरी ६ सीट परेको छ ।
तीन सीट दाबी गरेको नेकपा एकीकृत समाजवादीले बागमती र कर्णालीमा १/१ सीट प्राप्त गरेको छ । यद्यपि उसले ३ सीट दाबी गरे पनि २ सीट मात्रै पाएपछि असन्तुष्टि जनाएको छ ।
बालुवाटार बैठकलगत्तै उसले सचिवालयको बैठक बोलाएको छ । उपेन्द्र यादव नेतृत्वको जनता समाजवादीले मधेसमा १ सीट पाएको छ ।
