एजेन्सी । इजरायली रक्षा बल (आईडीएफ)ले इजरायल र हमासबीच ७ अक्टोबर २०२३ देखि चलिरहेको युद्धमा महत्त्वपूर्ण सफलता हासिल गरेको छ ।
टाइम्स अफ इजरायलका अनुसार इजरायली रक्षा बल (आईडीएफ)ले लेबनानमा हिजबुल्लाह लक्ष्यहरूमा ड्रोन आक्रमणको क्रममा हमासका उपनेता सालेह अल–अरौरीलाई मारेको छ । हमासले पनि यसको पुष्टि गरेको छ ।
हमास नेता इस्माइल हानियाले अरौरीको मृत्युको बदला लिने वाचा गरेका छन् । उनले यो आक्रमण लेबनानको सार्वभौमसत्ताको उल्लङ्घन भएको बताउँदै अब जे भए पनि इजरायल आफै जिम्मेवार हुने चेतावनी दिए । अमेरिकी समाचार च्यानल सीएनएनको रिपोर्ट अनुसार आईडीएफले मङ्गलबार राति मध्य गाजामा रहेको हमासको खुफिया र नियन्त्रण केन्द्र कब्जा गरेको थियो ।
गाजास्थित हमासको स्वास्थ्य मन्त्रालयले मंगलबार राति सञ्चारमाध्यमलाई इजरायली हमलामा हालसम्म २२ हजार प्यालेस्टिनी मारिएको जनाएको छ ।
विज्ञप्ति अनुसार ९ दिनमा एक हजार जनाको मृत्यु भएको छ । यसबाहेक जनवरी १ र २ को बीचमा २ सय ७ जनाको मृत्यु भएको छ । ३३८ जना घाइते भएको बताइएको छ । विज्ञप्तिमा मारिने र घाइतेमध्ये कति जना हमासका लागि लडिरहेका थिए भन्ने खुलाएको छैन ।
