काठमाडौँ । क्रिकेट खेलाडी सन्दीप लामिछाने राष्ट्रिय टोलीबाट स्वत: अलग भएका छन् । काठमाडौँ जिल्ला अदालतले बलात्कार आरोपमा दोषी ठहर्याएपछि उनी राष्ट्रिय टीमबाट स्वत: अलग भएका हुन् ।
अदालतले शुक्रबार सन्दीपमाथिको मुद्दामा दोषी ठहर गरेको थियो । यद्यपि उनको सजाय निर्धारण भने भइसकेको छैन । यही पुस २५ गते काठमाडौं जिल्ला अदालतले सजाय तोक्ने छ । सन्दीपले भने जिल्लाको फैसलाविरुद्ध थुनाबाहिर रहेरै पुनरावेदन गर्न सक्नेछन् ।
नेपाल क्रिकेट संघ (क्यान) का अनुसार जेल नपरे पनि सन्दीपले नैतिक र कानूनीरुपमा राष्ट्रिय टीमबाट खेल्न मिल्दैन । तर कानूनमा गम्भीर अभियोग प्रमाणित भएका खेलाडीले राष्ट्रिय टीमबाट खेल्न पाउने वा नपाउनेबारे स्पष्ट व्यवस्था गरिएको छैन ।
सन्दीपले शनिबार वीरगञ्जमा भएको प्रो क्लब च्याम्पियनसीपको फाइनलबाट आफूलाई अलग गरेका थिए । उक्त प्रतियोगितामा पर्साको नेतृत्व गरेका सन्दीपले टीमलाई फाइनलमा पुर्याए पनि अन्तिम खेलमा उनी अनुपस्थित भएपछि पर्साले हार बेहोरेको थियो ।
