काठमाडौँ । नेपाली कांग्रेसकी केन्द्रीय सदस्य डा आरजु राणा देउवाले पार्टीमा कुनै पनि असहमित भएमा पार्टीभत्रि मिलाएर जानुपर्ने बताएकि छिन् ।
नेपाली कांग्रेसको केन्द्रीय कार्यसमितिको जारी बैठकमा आफ्नो धारणा राख्दै उनले भनिन् ‘यदि हाम्रो पार्टीभित्र कुनै प्रकारको बेमेल या असहमति आदि छन् भने तिनलाई बसेर पार्टीभित्रै मिलाउनुपर्छ । जहिले पनि पार्टीभित्र झगडा रहेको जस्तो गरेर बाहिर सार्वजनिक गर्नुहुदैन । बाहिरबाट हेर्दा कांग्रेस कार्यकर्ताले पार्टीमा सहमति र एकता देखे भने मात्र उनीहरुको मनोबल बढ्छ र हाम्रो पार्टी बलियो हुन्छ ।’
पार्टीका सिनियर नेताहरु भनेका पार्टीका सम्पत्ति र महत्वपूर्ण व्यक्तिहरु भएकाले उहाँहरु एकै ठाउँमा बस्ने र पार्टीभित्रका र आफ्ना जति पनि विषयमा असहमति छन् तिनलाई समाधान गरी सहमतिबाट नै अघि बढ्नुपर्ने उनको सुझाव थियो ।
उनले पछिल्लो समयमा पार्टीले छिटो छिटो केन्द्रीय समितिको बैठक बोलाएर आवश्यक छलफल र परामर्श गर्ने गरेकामा खुसी पनि व्यक्त गरिन् । यस्तै अवसरहरुमा आफ्ना असहमतिहरुको छलफल गरी निकास निकाल्न र पार्टीका भित्रि कुराहरु सार्वजनिक गरेर कांग्रेसलाई कमजोर नबनाउन उनको आग्रह थियो ।
समाजमा निराशा किन देखिएकोछ भन्ने कुरा पार्टीका नेताहरुले नै मनन् गर्नुपर्ने भन्दै कांग्रेस नेत्री डा राणाले राजनीतिक दलकै नेताहरुले नै सबैतिर खतम छ, कतै राम्रो छैन र केही भएन भन्नेजस्ता खालका निराशाका कुरा गरेकाले नै समाजमा यस्तो अवस्था आएको उहाँको भनाई थियो ।
डा राणाले समाजमा सकारात्मकता र राम्रो कुराको स्थापनाका लागि हामी आफैँ सकारात्मक हुनुपर्ने र भाषण या हाम्रा कार्यक्रमहरुमा हामीले बोल्ने कुरामा त्यस्तै सन्देश दिनुपर्ने उहाँले बताउनुभयो ।
डा राणाले देशमा युवा शक्ति विदेशिँदै गएकामा चिन्ता व्यक्त गर्दै देशका युवालाई स्वदेशमै रोक्न उनीहरुलाई रोजगारीका कार्यक्रमहरु ल्याउन पनि सुझाव दिनुभयो ।
संसदको कृषि सहकारी तथा प्राकृतिक स्रोत समितिको सभापति समेत रहेकी डा राणाले नेपालमा कृषिको सम्भावना र भविष्य रहेकाले कृषिका कार्यक्रमहरुमार्फत् युवामा रोजगारीका सम्भावना सिर्जना गर्नुपर्ने बताइन् ।
उनले नेपालका कृषि उत्पादनलाई विदेशी बजारबाट आउने कमसल खालका उत्पादनले विस्थापित गर्ने गरेकाले त्यसतर्फ सरकारले ध्यान दिनुपर्ने पनि सुझाव दिइन् ।
उनले भनिन् ‘भारतीय बजारबाट यस्तै प्रकारका कृषि उपजहरु आउने गरेका छन्, ती उपजहरु वास्तवमा कमसल खालका र गुणस्तरहिन रहेका भए पनि बोर्डरमा रहेका प्रहरीले थाहा नपाउने गरेकाले नेपाली बजारमा प्रवेश गर्ने गरेको छ । यसलाई रोक्नुपर्छ र कृषिमा आत्मनिर्भर अर्थतन्त्रको विकासका लागि सरकारले प्रभावकारी आयोजनाहरु ल्याउन सक्नुपर्छ ।
