काठमाडौँ । राष्ट्रिय प्रजातन्त्र पार्टी (राप्रपा)ले कोरियाली भाषा सम्बन्धि इपिएस परीक्षामा सहभागिताको विषयलाई लिएर आन्दोलनमा उत्रिएका युवाहरु लक्षित प्रशासनको दमन र गोली प्रहार घटनाको खेद प्रकट गरेको छ ।
सो पार्टीका अध्यक्ष राजेन्द्र लिङ्देनले एक वक्तव्य जारी गर्दै युवाहरु लक्षित प्रशासनको दमन र गोली प्रहारको घटना दुःखद, आपत्तिजनक र दुर्भाग्यपूर्ण रहेको जनाउनु भएको छ ।
स्वदेशमा गरि खान पाउने वातावरण नपाएका बेरोजगार यूवालाई सरकारले सम्यमता गुमाइ गोली प्रहार गरेर हत्या गर्नु गम्भीर चिन्ताको विषय रहेको राप्रपाको भनाई छ ।
इपिएस कार्यालय अगाडि भएको प्रदर्शनका क्रममा दुई युवाको हत्या गरेर सरकार स्वयंले परिस्थितिलाई उत्तेजित तुल्याएको भन्दै राप्रपाले घटनाको सत्यतथ्य छानविन गर्न, घाइतेको उपचार गर्न सरकारसँग माग समेत गरेको छ ।
साथै, प्रशासनिक दमनबाट ज्यान गुमाएकाहरुप्रति श्रद्धाञ्जली व्यक्त गर्दै राप्रपाले परिवारजनमा समवेदना प्रकट समेत गरेको छ ।
