मस्को । रुसी राष्ट्रपति भ्लादिमिर पुटिनले युक्रेन युद्धको सम्बन्धमा रुसको लक्ष्यलाई परिवर्तन नगरेको बताउनुभएको छ । “हामी लडाइँ जारी राख्नेछौँ र हाम्रो जे छ त्यसलाई छोड्ने छैनौँ”, उहाँले भन्नुभएको छ ।
यद्यपि सार्वजनिक रूपमा पुटिनले युक्रेनमा आक्रमण गरेको देखिए पनि ब्याक च्यानल कूटनीतिमार्फत उहाँले फरक सन्देश पठाइरहनुभएको छ ।
उहाँ युक्रेनमा युद्धविराम सम्झौता गर्न तयार हुनुहुन्छ। पुटिनले सेप्टेम्बरदेखि नै मध्यस्थकर्तामार्फत युद्धविराम चाहेको संकेत दिइरहनुभएको छ । उहाँले दिएको संकेतअनुसार अहिलेको सिमाना कायम भएकै अवस्थामा लडाइँ रोकिनेछ ।
न्युयोर्क टाइम्सले दुई पूर्ववरिष्ठ रुसी अधिकारी तथा क्रेमलिन र अमेरिका नजिक रहेका अमेरिकी अधिकारीहरूलाई उद्धृत गर्दै एउटा रिपोर्टमा यस्तो दाबी गरेको हो।
रिपोर्टअनुसार यी दुवै अन्तर्राष्ट्रिय अधिकारीले पुटिनका मेसेन्जरबाट सन्देश प्राप्त गरेका छन् । मेसेन्जरमा युद्धविरामको इच्छा व्यक्त गरिएको छ ।
रिपोर्टमा पुटिनले एक वर्षअघि सन् २०२२ को अन्त्यमा पनि युद्धविराम सम्झौताका लागि आह्वान गर्दै सन्देश पठाउनुभएको दाबी गरिएको छ । रुसले कब्जा गरेको भूभागबाट आफू सन्तुष्ट रहेको र युद्धविरामका लागि तयार रहेको पुटिनले फेरि संकेत गर्नुभएको छ ।
रिपोर्टमा युद्धविरामसम्बन्धी वार्ता भएमा कब्जा गरिएका क्षेत्रहरू फिर्ता हुने वा नगर्ने कुनै संकेत दिइएको छैन। रिपोर्टले पुटिनले आफ्नो मन परिवर्तन गर्न सक्ने चेतावनी पनि दिएको छ।
युक्रेनलाई युद्धमा अमेरिकाले निरन्तर सहयोग गरिरहेको छ । अमेरिकी राष्ट्रपति जो बाइडेनले युक्रेनलाई हरसम्भव सहयोगको घोषणा गर्नुभएको छ ।
अहिले अमेरिकामा पनि युद्धविरामको चर्चा भइरहेको छ । युक्रेनलाई अमेरिकाले जारी गरेको आर्थिक सहयोगमा धेरै संस्था र सर्वसाधारणले आपत्ति जनाइरहेका छन् ।
युक्रेन र रुसबीचको युद्ध भएको लगभग दुई वर्ष भइसकेको छ । फेब्रुअरी २०२२ मा रुसले छिमेकी युक्रेनमा आक्रमण गर्यो। त्यतिबेला यो युद्ध लामो समयसम्म नचल्ने र चाँडै नै रुसी सेनाले युक्रेनको अधिकांश भागलाई नियन्त्रण गर्ने भन्ने विश्वास गरिएको थियो।
यसको विपरित युक्रेनले लगातार रुससँग लडाइ र सामना गर्दै आएको छ। झण्डै दुई वर्षदेखि जारी युद्ध अझै अन्त्य हुने संकेत देखिँदैन ।
