काठमाडौँ । राष्ट्रिय स्वतन्त्र पार्टी (रास्वपा)ले गत वर्ष मंसिर ४ मा सम्पन्न निर्वाचनमा विजयी गराउने मतदाताहरुको सम्मानमा घरदैलो कार्यक्रम गर्दैछ । यो कार्यक्रम आगामी मंसिर २, ३ र ४ गते हुनेछ ।
निर्वाचन भएको एक वर्ष पुगेको अवसरमा मतदातालाई धन्यवाद दिन मंसिर ४ गतेको निर्वाचनमा उम्मेदवार भएका सबैजना आ आफ्नो निर्वाचन क्षेत्रमा पुग्ने तयारी रास्वपाले गरेको छ । संसदमा रास्वपाका २१ सांसद र पदाधिकारीसहित ३९ केन्द्रीय सदस्य छन् । गत निर्वाचनमा रास्वपाले प्रतिनिधि सभाको प्रत्यक्षतर्फ १३१ र समानुपातिकमा १०७ जना उम्मेदवार उठाएको थियो ।
रास्वपा सभापति रवि लामिछानेले न्युजपोलारसंग भन्नुभयो, ‘निर्वाचनमा मत माग्न गएजस्तै घर–घर टोल–टोलमा गएर धन्यवाद दिने र हामी प्रतिबद्धतामा अडिक छौँ भन्ने सन्देश दिनेछौं । उहाँले अगाडि भन्नुभयो, प्रदेश र संघीय निर्वाचन सकिएको एक वर्ष पुगेको अवसरमा जनताका गुनासा र सुझाव सुन्न घरदैलोमा जान लागेका हौं ।”
यही कात्तिक २३ गते बसेको केन्द्रीय समिति र संसदीय दलको संयुक्त बैठकले घरदैलो कार्यक्रम गर्ने निर्णय गरेको थियो । २०७९ असार ७ मा स्थापना भएको रास्वपाले ६ महिना नपुग्दै प्रतिनिधिसभामा प्रत्यक्षतर्फ ७ स्थानमा विजयी हुनुका साथै समानुपातिकमा ११ लाख ३० हजार ३४४ मत प्राप्त गरी १४ सांसद विजयी भएका थिए ।
