एजेन्सी । भारतीय बलर मोहम्मद शामीले वानखेडे मैदानमा आफ्नो किलर बलिङको साथ भारतीय फ्यानलाई भरपुर मनोरञ्जन दिलाए । न्युजिल्यान्डका कुनै पनि ब्याट्सम्यानले शामीको बलको जवाफ पाउन सकेनन् ।
भारतीय फास्ट बलरले आफ्नो घातक बलिङले न्युजिल्याण्डको ब्याटिङ अर्डरलाई तितरबितर पारे । शामीले न्युजिल्यान्डका एक–दुई नभई सात जना ब्याट्सम्यानलाई प्याभिलियन पठाएर फाइनलमा भारतको स्थान पक्का गरे ।
मोहम्मद शामी एकदिवसीय क्रिकेटको इतिहासमा भारतका लागि एक इनिङ्समा ७ विकेट लिने पहिलो बलर बनेका छन् । शामीले उत्कृष्ट बलिङ गर्दै ५७ रनमा सात विकेट लिए । शामीले हानेको यो जादुई स्पेल ५० ओभरको क्रिकेटमा भारतको उत्कृष्ट बलिङ स्पेल पनि हो ।
यस्तै, शामी एकदिवसीय विश्वकपमा सर्वाधिक ५ विकेट लिने बलर पनि बनेका छन् । यस मामिलामा उनले अष्ट्रेलियाका दिग्गज बलर मिचेल स्टार्कलाई पछाडि छोडेका छन् । शामीले एकदिवसीय विश्वकपमा चौथो पटक एक इनिङमा पाँच विकेट लिने कीर्तिमान बनाएका छन् ।
शामी विश्वकपको एक सिजनमा तीन खेलमा पाँच वा सोभन्दा बढी विकेट लिने विश्वकै पहिलो बलर समेत बनेका छन् । शामीले विश्वकप २०२३ मा तेस्रो पटक पाँच विकेट लिएका थिए । शामीले लिग चरणको खेलमा न्युजिल्यान्डविरुद्ध पाँच विकेट लिएका थिए । यो विश्वकपमा शामीले न्यूजिल्याण्डविरुद्धको दुई खेलमा कुल १२ विकेट लिए ।
शामी एकदिवसीय विश्वकपको एउटै संस्करणमा सर्वाधिक विकेट लिने बलर पनि बनेका छन् । फास्ट बलरले यस मामिलामा जाहिर खानलाई पछाडि छोडेका छन् । शामीले विश्वकप २०२३ मा हालसम्म ६ खेलमा २३ विकेट लिएका छन् । जाहिरले सन् २०११ मा कुल २१ विकेट लिएका थिए ।
