कैलाली । सामाजिक सञ्जालको प्रयोगबाट फाइदा लिन सके सुचना प्राप्त हुनुका साथै मनोरञ्जन पनि प्राप्त गर्न सकिन्छ । तर यसै सामाजिक सञ्जालको दुरुपयोग गरेमा यसले ज्यानै जाने पनि हुनसक्छ ।
यस्तै घटना कैलालीको कर्णाली पुलमा घटेको छ । अहिले युवामाझ निकै चर्चित बनेको सामाजिक सञ्जाल टिकटक बनाउने चक्करमा कर्णाली पुलबाट हाम फाल्दा १ जना बेपत्ता भएका छन् । शनिबार ३ जनाले टिकटक बनाउने भन्दै नदिमा फाल हानेका थिए ।
तीमध्ये लम्कीचुहा नगरपालिका वडा नम्बर २ का १८ वर्षीय सञ्जय खड्का कर्णाली नदीमा बेपत्ता भएका छन्। उनीसँगै नदीमा हाम फालेका लम्कीचुहा नगरपालिका वडा नम्बर १ का १८ वर्षीय लोकेश प्याकुरेल र १७ वर्षीय वीरेन्द्र सिंहलाई सकुशल उद्दार गरिएको थियो ।
घाइते भएका प्याकुरेलको नेपालगञ्जमा उपचार भइरहेको जिल्ला प्रहरी कार्यालय कैलालीले जनाएको छ । उनीहरू तिनै जना कक्षा १० मा अध्यनरत हुन् । बेपत्ताको खोजी जारी छ ।
