काठमाडौं । प्रधानमन्त्री बालेन्द्र शाहले देशले अकल्पनीय विपत्तिको सामना गरिरहेको भन्दै उद्धार तथा राहतका लागि सरकार यथाशीघ्र र यथाशक्य रूपमा जुटिरहेको बताएका छन्।
सामाजिक सञ्जालमार्फत सन्देश जारी गर्दै प्रधानमन्त्री शाहले सिङ्गो देश, विश्वभर रहेका नेपाली तथा अन्तर्राष्ट्रिय समुदायको सहयोग र सहकार्यमा विपत्तिको सामना भइरहेको बताएका हुन्।
उनका अनुसार आज बिहान ६ः३० बजेदेखि उद्धारका लागि हवाई उडान सुरु गरिएको छ। बिहानदेखि हालसम्म १५ भन्दा बढी उडान भइसकेका छन् भने थप हेलिकोप्टरहरू उद्धारका लागि तयारी अवस्थामा राखिएका छन्।
नेपाली सेनाले सञ्चालन गरेको उद्धार अभियानमार्फत रसुवाको टिमुरेबाट ११६ जनालाई सकुशल उद्धार गरिएको प्रधानमन्त्री शाहले जानकारी दिएका छन्। उद्धार गरिएकामध्ये ९५ जना नेपाली र २१ जना भारतीय नागरिक रहेका छन्। यस्तै, टनेलबाट सात जना नेपाली नागरिकलाई समेत सफलतापूर्वक उद्धार गरिएको उनले बताएका छन्।
प्रभावित क्षेत्रमा अत्यावश्यक सहयोग सामग्री द्रुत रूपमा पुर्याउने काम भइरहेको जनाउँदै प्रधानमन्त्री शाहले जेनेरेटर, पोर्टेबल मोबाइल टावर, मेडिकल सामग्री, टेन्ट तथा फलाम–ढुङ्गा काट्ने मेसिनलगायतका सामग्री प्रभावित क्षेत्रमा पठाइँदै गरेको जानकारी दिएका छन्।
उनका अनुसार प्रभावित क्षेत्रमा छिट्टै मोबाइल नेटवर्क तथा मोबाइल चार्जिङको अस्थायी व्यवस्था गरिनेछ। यसले सम्पर्कविहीन अवस्थामा रहेका नागरिकसँग सम्पर्क स्थापित गर्न सहयोग पुग्ने अपेक्षा गरिएको छ।
नुवाकोटमा अस्थायी शिविर तयार गरी खाना तथा पानीको व्यवस्था गरिएको पनि प्रधानमन्त्री शाहले बताएका छन्। प्रभावित क्षेत्रको अवस्थाबारे ड्रोन सर्वेक्षणमार्फत सूचना सङ्कलन गर्ने काम अन्तिम चरणमा पुगेको र त्यसबाट उद्धार तथा राहतलाई थप प्रभावकारी बनाउन सहयोग पुग्ने उनको भनाइ छ।
प्रधानमन्त्री शाहले हेलिकोप्टरबाट उद्धार गर्दा सुरुमा सिकिस्त बिरामी, वृद्धवृद्धा, महिला तथा बालबालिकालाई प्राथमिकता दिइने बताएका छन्। उनले विपत्तिको अवस्थामा सबैलाई धैर्य र संयम कायम राख्न आग्रह गर्दै उद्धार तथा राहतका लागि राज्यको सम्पूर्ण संयन्त्र परिचालन गरिएको बताएका छन्।
“आशा र विश्वासका साथ हामी सबै एक भएर यो विपद्को डटेर सामना गर्नुपर्नेछ,” प्रधानमन्त्री शाहले भनेका छन्। विपद्को समयमा हातेमालो गर्ने सबैप्रति उनले धन्यवादसमेत व्यक्त गरेका छन्।
