पोखरा । चिनियाँ राजदुत छन सोङले जाजरकोट र पश्चिम रुकुमका भूकम्पपीडितका लागि झण्डै ३० करोड बराबरको राहत सामाग्री नेपाललाई हस्तान्तरण गरेका छन् ।
राजदुत सोङले उपप्रधानमन्त्री एवम् गृहमन्त्री नारायणकाजी श्रेष्ठलाई भूकम्पपीडितका लागि चीन सरकारले पठाएका राहत सामाग्री हस्तान्तरण गरेका हुन् ।
आज बिहान पोखरा विमानस्थलमा चिनियाँ सेनाको दुईवटा एयरक्राफ्टमार्फत झन्डै ३० करोड मुल्य बराबरको सामाग्री आएको थियो । दुईवटा एयरक्राफ्टबाट ४ हजार ६ सय ब्लाङ्केट र ६ सय टेन्ट आएको छ । यस्तै, केरुङ नाका हुँदै चिनले झन्डै १० करोड बराबरको २३ ट्रक छुट्टै राहत सामाग्री पठाएको छ ।
चिनियाँ सेनाको राहत सामाग्री बुझेपछि उपप्रधानमन्त्री श्रेष्ठले त्यसका लागि चिनियाँ सरकारप्रति कृतज्ञता व्यक्त गरे। उपप्रधानमन्त्री श्रेष्ठले नेपाल र चीन ऐतिहासिक मित्रदेश भएको र दुबै मुलुक एकअर्काको दु:खमा साथमा रहेको बताए ।
यस्तै, राजदुत सोङले भुकम्पका कारण भएको मानवीय र भौतिक क्षतिप्रति गहिरो दुख व्यक्त गर्दै मृतकहरूमा श्रद्धाञ्जली र पीडामा परेका जनतामा समवेदना व्यक्त गर्दै नेपाल र नेपाली जनताको दु:खमा आफ्नो देशको सधैं साथ सहयोग रहने बताए । साथै, उनले राष्ट्रपति सि जिन पिङले समेत पत्र पठाएर त्यो संवेदना जाहेर गर्नुभएको बताए।
