काठमाडौँ । टी–२० विश्वकप क्वालिफायरको समूह चरणको अन्तिम खेलमा ओमनले नेपाललाई ५ रनले हराएको छ । योसँगै समुह उपविजेता बनेको नेपालले समूह बी को विजेता र ओमानले समूह बी को उपविजेतासँग शुक्रबार सेमिफाइनल खेल्नेछन् ।
जितका लागि १४६ रनको सामान्य लक्ष्य पाएको नेपालले निर्धारित २० ओभरमा अलआउट हुदै १४० रन बनायो । १६ ओभरमा ८५/८ को स्थितीमा रहेको नेपाललाई विवेक यादब र करण केसिले उत्कृष्ट साझेदारी गरे । विवेकले २४ बलमा ५ छक्का प्रहार गर्दै सर्वाधिक ३९ रन बनाए । लगातार तीन छक्का प्रहार गर्दै विवेकले नेपाललाई जित नजिक पुर्याएका थिए । नेपाललाई जितको लागि अन्तिम ६ बलमा २६ रन चाहिँएको थियो । विवेकले सुरुवाती दुई बलमा बिलाल खानलाई छक्का हानेपछि बाँकी चार बलमा १३ रन चाहिँएको थियो । तेस्रो बलमा पनि विवेकले छक्का हानेपछि खेल रोचक बनेको थियो ।
नेपाललाई जितको लागि तीन बलमा ७ रन चाहिँएको थियो । चौथो बलमा विवेक क्याच आउट भएका थिए । पाँचौं बलमा अभिनाश बोहराले एक रन लिए । अन्तिम बलमा नेपाललाई जितको लागि छक्का चाहिँदा स्ट्राइकमा रहेका करण लङअनमा क्याच आउट भएपछि नेपाल पराजित भएको थियो । करणले ११ बलमा एक छक्का र एक चौका प्रहार गर्दै १५ रन बनाए ।
नेपालको लागि ओपनर कुशल भुर्तेलले १८ बलमा एक चौका र तीन छक्का प्रहार गर्दै २६ रन बनाए । यस्तै, सोमपाल कामि, कुशल मल्ल र सन्दीप जोराले समान १२ रन बनाए । कुशल मल्लले १० रन बनाउदा ओपनर आसिफ शेख ५ र गुल्शन झाले तीन रन बनाए ।
ओमानका लागि विलाल खानले ४ ओभरमा ३० रन खर्चेर ३ विकेट लिए । अकिब इलयास, सकिल अहमद र जिशान मकसुदले समान २ विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको ओमानले निर्धारित २० ओभरमा ९ विकेट गुमाउँदै १ सय ४५ रन बनाएको थियो । ओमानका जिशान मकसुद सर्वाधिक ३२ रन बनाए । यस्तै, नसिम खुसीले २५ र आयन खानले १८ रन बनाउदा सकिल अहमद २२ रनमा नट आउट रहे ।
नेपालका लागि करण केसीले सर्वाधिक ३ विकेट लिएका थिए । सोमपाल कामीले ४ ओभरमा १६ रन खर्चेर २ विकेट लिदै टि२० आईमा ५० औं विकेट पूरा गरेका थिए । यस्तै, सन्दीप लामिछानेले २ विकेट र गुलशन झाले १ विकेट लिए ।
