आइसिसी विश्वकप क्रिकेट अन्तर्गत बिहीबारको दिवारात्रि खेलमा दक्षिण अफ्रिकाले यस सिजन खराब प्रदर्शन गरिरहेको अस्ट्रेलियालाई १३४ रनको फराकिलो रन अन्तरले पराजित गरेको छ ।
भारतको लखनउमा भएको यस खेलमा दक्षिण अफ्रिकाले दिएको ३१२ रनको विशाल लक्ष पछ्याउने क्रममा अस्ट्रेलियाको टोली ४०.५ ओभरमा १७७ रनमै समेटिएको थियो ।
टस हारेर पहिले ब्याटिङको निम्तो पाएको दक्षिण अफ्रिकाका लागि प्रारम्भिक ब्याट्सम्यान क्विन्टन डी ककले व्यक्तिगत १०९ रन बनाएर टिमको आधार तयार पारेका थिए । म्याक्सवेलको बलमा बोल्ड हुनुअघि उनले ८ चौका र ५ छक्का प्रहार गरेका थिए ।
अन्य ब्याट्सम्यानमा कप्तान टेम्बा बाभुमाले ३५, रासी भान डर डुसेनले २६, ऐडन मार्करामले ५६, हेनरिच क्लासेनले २९, डेभिड मिलरले १७, मार्को यान्सेनले २६ रन बनाएका थिए ।
खराब फिल्डिङ गरेको अस्ट्रेलियाका लागि मिचेल स्टार्क र ग्लेन म्याक्सवेलले समान दुई दुई विकेट लिएका थिए भने जस हेज्लवुड, प्याट कमिन्स र अडाम जाम्पाले समान एक एक विकेट लिएका थिए ।
जितका लागि ३१२ रनको लक्ष पछ्याएको अस्ट्रेलिया सुरुदेखि नै दबाबमा परेको थियो । प्रारम्भिक ब्याट्सम्यान मिचेल मार्श ७ र डेभिड वार्नर १३ रनमै पवेलियन फर्केपछि ठूलो रन पछ्याएको अस्ट्रेलियाले नियमित अन्तरालमा विकेट गुमाएको थियो ।
स्टिभन स्मिथ १९, मार्नस लाबुसाग्ने ४६, जस इन्गिस ५, ग्लेन म्याक्सवेल ३, मार्कस स्टोइनिस ५, मिचेल स्टार्क २७, प्याटक कमिन्स २२, एडम जाम्पा ११ र जस हेज्लवुड २ रन बनाएर आउट भए ।
चुस्त फिल्डिङ गरेको दक्षिण अफ्रिकाका लागि कागिसो राबाडाले ३ विकेट लिएका थिए भने मार्को यान्सेन, केशव महाराज र तब्रेज शाम्सीले समान दुई दुई विकेट लिएका थिए । लुंगी एन्गेडीले १ विकेट लिए ।
यो जितसँगै दक्षिण अफ्रिकाले २ खेलबाट ४ अंक बटुलेर पहिलो स्थानमा उक्लिएको छ । यद्यपी समान ४ अंक भएका न्युजील्यान्ड, भारत र पाकिस्तानले पनि दुई दुई खेल जितेर रन रेटका आधारमा क्रमश: दोस्रो, तेस्रो र चौथो स्थानमा छन् ।
अस्ट्रेलिया भने लगातार २ खेलमा पराजित भएर अंक विहीन छ । यसअघि भएको खेलमा अस्ट्रेलिया भारतसँग पराजित भइसकेको छ ।
