काठमाडौँ । नेकपा(एमाले)का सचेतक महेश बर्तौलाले सरकार संविधान र कानून अनुसार हिँड्न नसकेका कारण मुलुकमा अराजकता बढेको बताउनुभएको छ ।
शुक्रवार नयाँ बानेश्वरस्थित संघीय संसद भवनमा सञ्चारकर्मीहरुसँग कुराकानी गर्दै सचेतक बर्तौलाले सरकार संविधान र कानून बमोजिम हिँड्न नसकेको बताउनुभएको हो ।
उहाँले सरकारले देशलाई स्थिरता र सुशासनतर्फ लान नसकेको पनि बताउनु भयो । उहाँले सरकारकै कारण देशमा अराजकता र अनुशासनहिनता बढेको बताउनु भयो । सचेतक बर्तौलाले स्वच्छन्दता र अराजकता बढेको कारणले गर्दा देशमा साम्प्रदायिक द्वन्द्व र हिंसाहरु भड्किन थालेको बताउनु भयो । प्रधानमन्त्रीले नै जातिय पहिचानको आधारमा राज्य निर्माण गरिदिने अभिव्यक्ति दिन थालेपछि त्यसको असर स्वरुप विभिन्न भड्कावहरु देखिन थालेको उहाँको भनाई छ ।
उहाँले भन्नुभयो – ‘मुख्य कुरा सरकार संविधान र कानून बमोजिम हिँड्न सकेन । सरकारको नालायकीपन हो । सरकारले देशलाई स्थिरतातर्फ, सुशासनतर्फ लाने सामथ्र्य राख्न सकेन । त्यसकारणले गर्दा यो समस्या आएको हो । किनभने सबैतिर अराजकता भयो । स्वच्छन्दता भयो । अनुशासनहिनता भयो । यसको कारण जनताहरुले जहाँ जे गरेपनि हुन्छ भन्ने ठाउँमा पुग्यो । जसको कारणले गर्दा साम्प्रदायिक द्वन्द्वहरु, हिंसाहरु भड्किन थाले । हामीमा जातिय, धार्मिक सद्भाव छ ।’
‘यस बमोजिम हामी अगाडी बढिरहेका थियौँ तर सरकारका प्रधानमन्त्री स्वयम् ०८४ सालको निर्वाचनको अहिल्यै भोट माग्दै, ०८४ सालमा हामीलाई बहुमत दिनुस्, हामी जातिय पहिचानको आधारमा राज्य निर्माण गरिदिन्छौँ भन्नुहुन्छ । त्यसको असर अर्को धर्ममा पर्छ । अर्को समुदायमा पर्छ । अर्को क्षेत्रमा पर्छ । एवम् रितले आगो विभिन्न हिसावले सल्किन थाल्यो । भुसको आगो सरह सल्किन थालेको छ । यसले समग्र देशको, हामी मिलेर बसेको समाजलाई नै असहजतातर्फ लान खोजेको चिन्ता व्यक्त गर्ने ठाउँमा हामीलाई पुर्याएको छ । यसको मुख्य कारण सरकार हो ।’
उहाँले सरकार संविधान र कानून अनुरुप हिडेर जवाफदेही बनेमा देशको अराजकता र अस्थिरता नियन्त्रण गर्न सकिने बताउनु भयो ।
