काठमाडौँ । प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले पार्टी सचिव डिलाराम आचार्यको स्वास्थ्य अवस्थाबारे जानकारी लिनुभएको छ ।
वीर अस्पतालमा उपचाररत आचार्यलाई बिहीबार बिहान भेटेर प्रधानमन्त्री प्रचण्डले स्वास्थ्य अवस्थाबारे जानकारी लिनुभएको हो ।
पार्टीको कार्यक्रममा आचार्य अछामको साँफेबगरमा अस्वस्थ हुनुभएको थियो । पार्टीको तीन महिने रुपान्तरण अभियानका क्रममा समीक्षा बैठकमा सहभागी हुन उहाँ साँफेबगर पुग्नुभएको थियो ।
माओवादी नेता खगराज भट्टका अनुसार साँफेबगरको एउटा होटलमा बसिरहेका बेला सचिव आचार्यको बोली एक्कासि बन्द भएको र शरीरको दायाँ भाग चल्न छोडेको थियो ।
त्यसपछि लगत्तै उहाँलाई उपचारका लागि अछामको बयलपाटा अस्पताल पुर्याइएको थियो । त्यहाँ उपचार हुन नसकेपछि नेपाली सेनाको हेलिकप्टरमार्फत नेपालगञ्ज ल्याइएको थियो ।
त्यहाँ पनि उपचार सम्भव नभएपछि जहाजमार्फत उहाँलाई काठमाडौँ ल्याइएको हो ।
