एजेन्सी । च्याम्पियन्स लिगको समूह चरण अन्तर्गतको खेलमा आर्सनलले हार ब्यहोरेको छ । गएराति भएको खेलमा इंग्लिस क्लब आर्सनल फ्रेन्च क्लब लेन्ससँग २–१ गोलले पराजित भएको हो । पाहुना टोली आर्सनलले खेलको १४ औं मिनेटमा गाब्रियल जेससको गोलबाट खेलमा सुरुवाती अग्रता बनाएको थियो ।
तर घरेलु मैदानमा खेलको २५ औं मिनेटमा एड्रियन थोमासनले र ६९ औं मिनेटमा एली वाहीले गोल गर्दै लेन्सलाई जित दिलाए । यो नतिजासँगै समूह बी मा लेन्स २ खेलमा ४ अंकका साथ तालिकाको शीर्ष स्थानमा रहँदा आर्सनल ३ अंकका साथ दोस्रो स्थानमा छ ।
यसै समूहको अर्को खेलमा सेभिया र पिएसभीले २–२ गोलको बराबरी खेल्दै अंक बाँडेका छन् । सेभिया २ अंकका साथ तेस्रो तथा पिएसभी एक अंकका साथ चौंथो स्थानमा रहेको छ ।
यसैगरी, गएराति नै भएको अर्को खेलमा म्यान्चेस्टर युनाइटेडले आफ्नै घरेलु मैदानमा टर्कीस क्लब गालाटासारेसँग ३–२ गोलको हार ब्यहोर्यो । युनाइटेडका लागि खेलको १७ औं र ६७ औं मिनेटमा रासमस होज्लन्डले दुई गोल गरेपनि टोलीलाई जित दिलाउन सकेनन् ।
पाहुना टोली गालाटासारेका लागि २३ औं मिनेटमा विल्फ्रेड जाहा ७२ औं मिनेटमा मुहमेद करिम अक्टरकोग्लुले र ८१ औं मिनेटमा मोउरो इकार्डीले गोल गरे ।
यो नतिजासँगै समूह ए मा गालाटासारे २ खेलबाट ४ अंकका साथ तालिकाको दोस्रो स्थानमा रहँदा अंकविहिन रहेको युनाइटेड तालिकाको पुछारमा छ ।
