एजेन्सी । ब्राजिलको अमेजन क्षेत्रमा ऐतिहासिक खडेरी परेको छ । यहाँका पोखरी र तालहरूमा पानीको तापक्रम रेकर्ड स्तरमा पुगेको छ ।
कतिपय ठाउँमा पानीको तापक्रम १०२ डिग्री फरेनहाइट अर्थात ४० डिग्री सेल्सियसभन्दा माथि पुगेको छ । यसैबीच, पछिल्लो सात दिनमा यहाँको टेफे तालमा सयभन्दा बढी डल्फिन मृत अवस्थामा फेला परेका छन् ।
वैज्ञानिकहरूले यसलाई असामान्य भनेका छन् । उनीहरुका अनुसार तालको तापक्रम र अमेजनमा भएको ऐतिहासिक खडेरी यसको कारण हुनसक्छ । विश्वको सबैभन्दा ठूलो जलमार्ग अमेजन नदी अहिले सुख्खा मौसमबाट गुज्रिरहेको छ, जसले नदीमा बस्ने जीवजन्तुलाई पनि असर गरिरहेको छ ।
सीएनएन रिपोर्टका अनुसार डल्फिनलाई बचाउन अन्य ताल र पोखरीमा सारिएको छ । जहाँ पानी कम तातो हुन्छ । यस काममा संलग्न अनुसन्धानकर्ताहरूका अनुसार यो सजिलो छैन । तिनीहरूलाई सार्नुअघि, अन्य नदीमा खतरनाक भाइरस वा विषाक्त पदार्थ छ कि छैन भनेर जाँच गर्नुपर्ने हुन्छ ।
डल्फिन पनि ह्वेल जस्तै स्तनधारी जलचर प्राणी हो । यो पानीमा ९९० फिट गहिराइमा जान सक्छ र पानीबाट २० फिटसम्म उफ्रन सक्छ । दुर्लभ जलचरको श्रेणीमा परेपछि यसको संरक्षणको काम सुरु भएको छ ।
तर, नदी किनारमा बस्ने माछा मार्नेलाई डल्फिनको डर बढी छ । जसको जालमा डल्फिन झर्छन् । उनीहरुलाई जोगाउन जनतामा चेतना फैलाउनु पनि जरुरी छ ।
