मुम्बईः चेन्नाई सुपर किङ्ग्स (सिएसके) का अलराउन्डर रवीन्द्र जडेजाको उत्कृष्ट ब्याटिङ र बलिङको मद्दतले विराट कोहलीको कप्तानीमा रहेको रोयल च्यालेन्जर्स बैंगलोर (आरसिबी) ६९ रनको विशाल अन्तरले पराजित भएको छ ।
इन्डियन प्रिमियर लिग अन्तर्गतको १९औं यस खेलमा जडेजाले ५ छक्का र ४ चौकाको मद्दतले २८ बलमा धुँवाधार ६२ रन बनाएका थिए । बलिङमा पनि उनले चार ओभरमा १३ रन मात्र दिएर ३ विकेट लिएका थिए । उनले खतरनाक ब्याट्सम्यान ग्लेन म्याक्सवेल, एबी डि भिलियर्स वासिङ्टन सुन्दरलाई आउट गरेका थिए भने डान क्रिस्टियनलाई रन आउट पनि गरेका थिए ।
टस जितेर पहिले ब्याटिङ रोजेको चेन्नाईले २० ओभरमा ४ विकेट गुमाएर १९१ रन बनाएको थियो । टिमका लागि जडेजाको ६२ रन बाहेक रुतुराज गैकवाडले ३३, फाफ डु प्लेसीले ५०, सुरेश रैनाले २४, अम्बाटी रायडूले १४ तथा कप्तान एमएस धोनीले २ रन बनाएका थिए ।
ठूलो विजय लक्षका साथ मैदानमा उत्रेको आरसिबीले यसअघिको फर्म देखाउन सकेन । नियमित अन्तरालमा आरसिबीका खेलाडी आउट भएका थिए । पूरै २० ओभर खेले पनि आरसिबीले ९ विकेटको क्षतिमा १२२ रन मात्र बनाउन सकेको थियो ।
आरसिबीका लागि कप्तान कोहलीले ८, देवदत्त पाडिकलले ३४, ग्लेन म्याक्सवेलले २२ रन बनाउनु बाहेक अरु खेलाडी सस्तैमा आउट भएका थिए ।
चेन्नाईका लागि इमरान ताहिरले पनि २ विकेट लिएका थिए ।
यो जितसँगै चेन्नाईले ५ खेलबाट ८ अंक बनाएको छ भने आरसिबीले पनि ५ खेलबाट ८ अंक नै बनाएर रन रेटका आधारमा दोस्रो स्थानमा छ ।
आइतबारको दोस्रो खेल दिल्ली क्यापिटल्स र सनराइजर्स हैदरावादबीच हुँदैछ । दिल्लीले पहिले ब्याटिङ गरेर २० ओभरमा १५९ रन मात्र बनाएको छ ।
सनराइजर्सले १२ ओभरको खेल सकिँदा ३ विकेटको क्षतिमा ८६ रन बनाएको छ । क्रिजमा केदार जाधव र केन विलियम्सन छन् । कप्तान डेभिड वार्नर ६, जोन्नी बेयरस्टो ३८ र विराट सिंह ४ रन बनाएर आउट भएका छन् ।
