काठमाडौँ । भुटानको चेम्गाङ केन्द्रीय कारागारबाट ३० वर्षभन्दा बढी जेल सजाय भोगेर रिहा भएका भुटानी राजनीतिक कैदी मधुकर मगरलाई बिहीबार आयोजित एक कार्यक्रममा सम्मान गरिएको छ ।
सो अवसरमा मगरलाई हेगस्थित भूटानमा राजनीतिक बन्दीहरूको रिहाइको लागि विश्वव्यापी अभियान (जीसीआरपीपीबी) ले सुरु गरेको गोफन्डमी अभियानमार्फत सङ्कलन भएको १६१८ युरो (रु २,१२,०१८.२८) हस्तान्तरण गरिएको थियो ।
सो अवसरमा बेलडाँगी क्याम्पका पूर्व शिविर सचिव तथा शिविरमा जीसीआरपीपीबीका प्रतिनिधिसमेत रहेका डीबी सुब्बाले भुटानी राजनीतिक कैदीको स्वतन्त्रताका लागि २०१९ मा गठन भएदेखि हालसम्म जीसीआरपीपीबीले गरेका कामका बारेमा सर्वसाधारणलाई जानकारी दिनुभएको थियो । जीसीआरपीपीबीले सबै भुटानी राजनीतिक बन्दीहरूको समयमै रिहाई र त्यसपछि उनीहरूको उचित पुनर्स्थापनाको लागि अथक प्रयास जारी राख्ने उहाँले बताउनुभयो ।
सुब्बाले सबै दाताहरूको नाम पढ्नुका साथै जीसीआरपीपीबीको तर्फबाट मधुकर मगरलाई पठाएको पत्र पनि पढेर हस्तान्तरण गर्नुभएको थियो ।
मगर भुटानको थिम्पुस्थित चेमगाङ केन्द्रीय कारागारमा ३० वर्ष चार महिनाको सश्रम कारावासपछि गत भदौ २३ गते रिहा हुनुभएको थियो ।
