काठमाडौं । राष्ट्रिय प्रजातन्त्र पार्टी (राप्रपा)ले आगामी महाधिवेशनको तयारीलाई तीव्र बनाएको छ। सोही क्रममा पार्टी अध्यक्ष राजेन्द्र लिङ्देनले महाधिवेशनका लागि गठित विभिन्न समितिका संयोजकहरूसँग बुधबार बैठक तथा छलफल गरेका छन्।
बैठकमा अध्यक्ष लिङ्देनले महाधिवेशनलाई व्यवस्थित, प्रभावकारी र सफल बनाउन प्रत्येक समितिलाई शीघ्र पूर्णता दिन निर्देशन दिएका छन्। उनले आ–आफ्नो समितिको विस्तृत कार्ययोजना तयार गरी अविलम्ब कार्य प्रारम्भ गर्न संयोजकहरूलाई आग्रह गरेका छन्।
महाधिवेशन तयारीका लागि गठित समितिहरूले जिम्मेवारीअनुसार समयमै काम अघि बढाउनुपर्नेमा जोड दिँदै लिङ्देनले सबै तहका नेता–कार्यकर्ताबीच समन्वय र सक्रियता आवश्यक रहेको बताए।
राप्रपाले महाधिवेशनलाई पार्टीको भावी दिशा तय गर्ने महत्वपूर्ण अवसरका रूपमा लिएको भन्दै तयारीलाई थप प्रभावकारी र परिणाममुखी बनाउन आवश्यक सबै कामलाई तीव्र गतिमा अघि बढाउने जनाएको छ।
