काठमाडौं । आन्दोलनरत् चिकित्सक र सरकारबीच वार्ता जारी रहेको छ । उपप्रधान तथा गृहमन्त्री नारायणकाजी श्रेष्ठको नेतृत्वमा गृहमन्त्रालयमा वार्ता चलिरहेको हो ।
वार्तामा स्वास्थ्यमन्त्रालयका अधिकारीलगायत स्वास्थ्यकर्मी ट्रेड युनियन, मेडिकल काउन्सिल, चिकित्सक संघलगायतका प्रतिनिधि सहभागि रहेका छन् ।
सुरक्षाको माग गर्दै डाक्टरहरु आन्दोलनमा उत्रिएका छन् । चिकित्सकमाथि लगातार भईरहेको आक्रमण र सुरक्षाको प्रत्याभूति नभएको भन्दै उनीहरू प्रदर्शनमा उत्रिएका हुन् ।
उनीहरुले स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन २०७९ अविलम्व कार्यान्वयन गर्नुपर्ने माग गरेका छन् ।
प्रदर्शनका क्रममा उनीहरुले जेल विथ आउट वेल लागू गर, चिकित्सकको सुरक्षाको ग्यारेन्टी गर, स्वास्थ्यमन्त्री राजीनामा दे, गृहमन्त्री राजीनामा दे, डाक्टर एकता जिन्दावाद लगाएका नारा लगाएका थिए ।
सोमबार पोखराको मणिपाल अस्पतालमा एक जना बिरामीको मृत्यु भएपछि मृतकका आफन्तहरूले चिकित्सकमाथि कुटपिट गरेका थिए । त्यस्तै उनीहरूले अस्पतालमा तोडफोड गरेका थिए । त्यसअघि लमजुङ जिल्ला अस्पताल र हेटौंडाको सञ्चो अस्पतालका डाक्टरमाथि पनि हातपात भएको थियो ।
