एजेन्सी । स्पेनिस फुटबल लिग ला लिगा अन्तर्गत बार्सिलोनाले रोेमाञ्चक जित निकालेको छ । गएराति भएको खेलमा बार्सिलोना दुई गोलले पछि परेको अवस्थामा सानदार कमब्याक गर्दै सेल्टा भिगोलाई ३–२ गोलले पराजित गरेको हो ।
घरेलु मैदानमा बार्सिलोनालाई रोमाञ्चक जित दिलाउन रोबर्ट लेवान्डोस्कीले दुई तथा जोआओ कान्सेलोले एक गोल गरे । खेलको १९ औं मिनेटमा जोर्गन लार्सेनले तथा ७६ औं मिनेटमा एनास्टासिओस डोभिकासले गोल गर्दै पाहुना टोली सेल्टालाई २–० को अग्रता दिलाएका थिए ।
तर, ८१ औं र ८५ औं मिनेटमा लेवान्डोस्कीले गोल गर्दै बार्सिलोनालाई २–२ गोलको बराबरीमा ल्याए । ८९ औं मिनेटमा कान्सेलोले गोल गर्दै बार्सिलोनालाई जित दिलाए ।
जितसँगै बार्सिलोना ६ खेलबाट १६ अंकका साथ तालिकाको शीर्षस्थानमा उक्लिएको छ । समान खेलबाट ४ अंकका साथ सेल्टा भिगो १७ औं स्थानमा छ ।
