काठमाडौं । अघिल्लो संसदीय व्यवस्था अर्थात् गणतन्त्र अघिको राजनीतिमा प्रायः सुनिने गरेको सांसद हराएका या किनबेच भएका समाचारहरु अहिले आएर पुनरावृत्ति भएका छन् । त्यस्तै घटना बुधबार गण्डकी प्रदेशमा भयो ।
त्यस समय कुनै सरकार बनाउन या ढलाउन पनि यसैगरी कि सांसदहरु कुनै होटलमा खानपानसहित मोजमस्तीका साथ राखिएका हुन्थे या कुनै दलका प्रभावकारी नेताको रोहबर तथा रेखदेखमा राखिने गरिन्थ्यो । अहिले पोखरामा पनि त्यस्तै भयो ।
कतिपय सांसद त्यहाँको एक रिसोर्टमा राखिएको थियो । त्यतिले पनि नपुगेर केहीलाई नेताको रोहबरमा पनि राखियो । अझै यतिले नै पनि पुगेन र दुई जना त संसदमै अनुपस्थित भए ।
नेपाली काँग्रेसको अगुवाईमा वर्तमान मुख्यमन्त्री पृथ्वी सुब्बा गुरुङका विरुद्धमा गण्डकी प्रदेश संसदमा अविश्वासका प्रस्ताव दर्ता भएको थियो, आजै अपरान्ह मतदान हुने तयारी थियो । बैठक शुरु भयो, मतदानको प्रक्रिया थालियो, तर दुई जना सांसद अनुपस्थित भएको खबर एकाएक बैठक हलमा आयो ।
ती थिए, राष्ट्रिय जनमोर्चाका खिमबिक्रम शाही र स्वतन्त्र सांसद राजिव गुरुङ (दीपक मनाङे) । राष्ट्रिय जनमोर्चाले वर्तमान सरकारको विरुद्धमा अर्थात काँग्रेस संसदीय दलका नेता कृष्णचन्द्र पोखरेलको पक्षमा मतदान गर्ने निर्णय गरेको थियो ।
पछिल्लो समयमा मनाङे पनि जनमोर्चासँग नजिकिएका थिए र विपक्षमा मतदान गर्ने भनेर पोखरेलको प्रस्तावको पक्षमा हस्ताक्षर गरेका थिए । यसै विषयमा राष्ट्रिय जनमोर्चाका अध्यक्ष चित्रबहादुर केसीले आफ्नो दलको निर्णय यथावत रहने बताउनुभयो । न्यूजपोलारसँग नेता केसीले गण्डकी प्रकरणलाइ पार्टीले गम्भिर रुपमा लिएको बताउनुभयो ।
