काठमाडौँ । सरकारको सिफारिसमा राष्ट्रपति रामचन्द्र पौडेलको निर्णयबाट कर्तव्य ज्यान मुद्दामा जन्मकैदको सजाय पाएका एक गुण्डा नाइकेले ६० प्रतिशत सजाय माफी मिनाहा पाएका छन् ।
नेपालगञ्जका गुण्डा नाइके रिगल भनिने योगराज ढकाललाई संविधान दिवसका अवसरमा राष्ट्रपति पौडेलले ११ वर्ष जेल सजाय छुटको निर्णय गर्नुभएको हो ।
मन्त्रिपरिषद् बैठकको सिफारिस अनुसार राष्ट्रपति पौडेलले ६७० जनाको कैद भुक्तान हुन बाँकी कैद कट्टा गरी सजाय माफी गर्ने निर्णय गर्नुभएको थियो ।
सो निर्णयसँगै दाङको घोराही कारागारबाट रिगलसहित ८ जना थुनामुक्त भएका छन् ।
ढकालको योजनामा २०७२ असार २८ गते नेपालगञ्जमा खुँडा प्रहार गरेर चेतन मानन्धरको हत्या भएको थियो । घटना भएका बेला ढकाल तरुण दल बाँके क्षेत्र नम्बर–३ का क्षेत्रीय सभापति थिए ।
भारतबाट सञ्चालन हुने अवैध बसहरुबाट हप्ता असूली गर्ने विषयमा विवाद हुँदा रिगलको योजनामा मानन्धर मारिएका थिए ।
