काठमाडौं । पाँचौं संस्करणको साफ यू–१९ च्याम्पियनसिप आजदेखि काठमाडौंमा सुरु हुँदैछ । घरेलु टोली नेपालले आज पाकिस्तानसँग खेल्दैछ । दशरथ रंगशालामा हुनलागेको नेपाल र पाकिस्तानबीचको खेल नेपाली समय अनुसार बेलुका ५:३० बजेबाट सुरु हुनेछ ।
यू–१९ च्याम्पियनसिपको पाँचौ संस्करणसम्म आइपुग्दा नेपाल र भारतले समान दुई पटक उपाधि जितेका छन् । अरु कुनै साफ राष्ट्रले अहिलेसम्म उपाधि हात पार्ने सकेको छैनन् । नेपालबाटै शुरु भएको यो उमेरसमूहको च्याम्पियनसिमा नेपालले तेस्रो पटक आयोजना गर्न लागेको हो ।
२०१५ मा काठमाडौंमा सम्पन्न पहिलो संस्करणमा विमल घर्तिमगरको कप्तानीमा नेपालले उपाधि जितेको थियो । त्यसको दुई वर्षपछि भुटानको थिम्पुमा नेपालले दोस्रो उपाधि जित्यो । यद्यपि, त्यो यु–१८ साफ च्याम्पियनसिप हो । नेपाल यसपाली पनि घरेलु भूमिमा उपाधि उचाल्न चाहन्छ।
यस्तै, प्रतियोगिताको उद्घाटन खेलमा भने भारत र बंगलादेश भिड्दै छन् । भारत र बंगलादेशबीचको खेल दशरथ रंगशाला मै दिउँसो १:३० बजेबाट सुरु हुने छ।
समूह ‘ए’ मा नेपाल, पाकिस्तान र माल्दिभ्स छन् । समूह ‘बी’ मा भारत, भूटान र बंगलादेश छन् । दुवै समूहबाट शीर्ष दुई टोली सेमिफाइनल प्रवेश गर्नेछन् । नेपालको कप्तानी गोलकिपर जियारथ शेखले गर्नेछन् । नेपालको पहिलो लक्ष्य समूहमा शीर्ष स्थान ओगट्दै सेमिफाइनलमा बलियो दाबेदारी प्रश्तुत गर्ने हुनेछ ।
२३ सदस्यीय नेपाली टोली:
गोलकिपर – जियारत शेख, रविन बोगटी, अमित तामाङ
डिफेन्डर – सेमन्ता थापा, विशाल नेपाली, विक्रम तामाङ, आयुष तिम्सिना, आश्विन घोरासाइने, दीपक थापा मगर, निशाङ पाराङडेन (लिम्बु), गौरव महर्जन
मिडफिल्डर – कुशल देउला, लक्षु थापा, प्रशान्त लक्षम, अभिनाश स्याङ्तान, अनिल भोम्जन, धनसिंह बिके, हरिशराज भट्ट, नेल्सन तामाङ
फरवार्ड – समिर तामाङ, निराजन धामी, सुजन डंगोल, सिद्धार्थ अधिकार
प्रशिक्षक– सुनिल श्रेष्ठ
