काठमाडौँ । नेपाली कांग्रेसका महामन्त्री गगन थापाले शिक्षकहरूलाई विद्यालय बन्द नगर्न अनुरोध गरेका छन् ।

बिहीबार सामाजिक सञ्जालमा लेख्दै महामन्त्री थापाले शिक्षा विधेयकमा थुप्रै सुधार आवश्यक रहेको र त्यसका लागि आफूहरूले काम गर्ने बताएका हुन‍् ।

शिक्षा विधेयक संसदमा दर्ता भइसकेकाले त्यसमाथि छलफल गर्ने र संशोधन गर्ने जिम्मा आफूहरूको रहेको बताउदै उनले भनेका छन्, ‘विद्यालय शिक्षा विधेयकमा थुप्रै सुधार आवश्यक छ, संसदमा हामी यसलाई सच्याउने नै छौँ, विद्यालय बन्द नगरौं ।’

शिक्षकहरूले राखेका मागलाई सम्बोधन गर्ने विषयमा आफूहरू प्रतिबद्ध रहेको जनाउदै उनले भने, ‘विद्यालय शिक्षासम्बन्धी विधेयकमा अनेकन् कमजोरीहरू छन्, ती सुधार गर्नै पर्नेछ । संसदमा दर्ता भइसकेपछि अब यो विधायिकाको कर्तव्य र जिम्मेवारी हो । हामी सबैसँग घनिभूत छलफल र संवाद गर्नेछौं । आन्दोलनरत शिक्षक, स्थानीय सरकार लगायत सरोकारवाला र चिन्तित अभिभावक एवं विद्यार्थी सबैका जायज माग र चिन्ताको सम्बोधन गर्ने कुरामा प्रतिबद्ध छौं ।’

उनले शिक्षकहरूलाई विद्यालय बन्द गर्ने अप्रिय बाटो अवलम्बन नगरी आन्दोलनको स्वरूप परिवर्तन गर्न आग्रह गर्दै भनेका छन्, ‘सांसदको भूमिका एवं विवेकमाथि विश्वास गरेर रचनात्मक ढंगले समाधानको खोजीका लागि मद्दत गर्न र विद्यालय बन्द गर्ने अप्रिय बाटो अवलम्बन नगरी आन्दोलनको स्वरूप परिवर्तन गर्न शिक्षक महासंघ लगायत सबै पक्षमा हार्दिक आग्रह गर्दछु ।’

नेपाल शिक्षक महासंघको आह्वानमा विभिन्न जिल्लाबाट काठमाडौँ आएका शिक्षक तथा विद्यालय कर्मचारीको आन्दोलनले माइतीघर मण्डलामा प्रदर्शन गरिरहेका छन् । संसदमा दर्ता भएको शिक्षा विधेयकमा विभिन्न १८ बुँदे असहमति जनाउदै उनीहरु बुधबार बाट सडकमा उत्रिएका हुन् ।

शिक्षकहरू आन्दोलनमा उत्रिएपछि आजदेखि देशभरका सामुदायिक विद्यालयहरु बन्द भएका छन् ।

यसै विषयमा सरकारसँग पहिलो चरणको छलफल समेत भएको छ । बिहीवार बिहान सिंहदरबारमा शिक्षकहरुले उपप्रधान एवं गृहमन्त्री नारायणकाजी श्रेष्ठसँग छलफल शुरु गरेपनि वार्ता निष्कर्ष बिहीन भएको थियो ।

https://www.facebook.com/thapagk/posts/859022268919663?ref=embed_post