काठमाडौँ । देशभरका शिक्षकहरूले विद्यालय शिक्षा विधेयकको विरोधमा राजधानी काठमाडौँ केन्द्रित भएर आन्दोलन गरिरहेका छन् ।
नेपाल शिक्षक महासंघको आह्वानमा विभिन्न जिल्लाबाट काठमाडौँ आएका शिक्षक तथा विद्यालय कर्मचारीको आन्दोलनले माइतीघर मण्डला आसपासका सडक अस्तव्यस्त भएको छ । बुधबार माइतीघर मण्डलादेखि नयाँ बानेश्वरम्म प्रदर्शन गरेका उनीहरूले आजदेखि थप आन्दोलनका कार्यक्रम चर्काउने चेतावनी दिएका छन् ।
संसदमा दर्ता भएको शिक्षा विधेयकमा महासङ्घले विभिन्न १८ बुँदे असहमति जनाउदै उनीहरु सडकमा उत्रिएका हुन् । जसमा सरुवा बढुवा, दरबन्दी, स्थानीय पालिकाअन्तर्गत नबस्नेसहितका माग छन् । सो माग पूरा नभएसम्म आन्दोलन नरोकिने महासंघले चेतावनी दिएको छ ।शिक्षकहरू आन्दोलनमा उत्रिएपछि आजदेखि देशभरका सामुदायिक विद्यालयहरु बन्द भएका छन् ।
बिहीवार बिहान सिंहदरबारमा शिक्षकहरुले उपप्रधान एवं गृहमन्त्री नारायणकाजी श्रेष्ठसँग छलफल शुरु गरेपनि वार्ता निष्कर्ष बिहीन भएको छ ।
