एजेन्सी । बलिउड अभिनेत्री सोनाक्षी सिन्हाले हालै मुम्बईको एउटा आलिशान भवनमा नयाँ फ्ल्याट किनेकी छन् ।
अभिनेत्रीको यो नयाँ घरको मूल्य करिब ११ करोड भारु रहेको बताइएको छ । सोनाक्षीको यो फ्ल्याट केसी रोड, बान्द्रा नजिकै रहेको ८१ ओरियट बिल्डिङको माथिल्लो तल्लामा छ ।
रियल इस्टेट सम्बन्धी वेबसाइट ज्याप्कीका अनुसार सोनाक्षीको नयाँ घर २२०८.७ वर्ग फुटमा फैलिएको छ । अभिनेत्रीले २९ अगस्टमा आफ्नो नयाँ घर दर्ता गराएकी थिइन् । यसका लागि उनले रु ५५ लाखको स्ट्याम्प शुल्क र ३० हजारको सम्पत्ति दर्ता पनि तिरेकी छन् ।
अभिनेत्रीको यो घरमा लबी, शौचालय र एयर ह्यान्डलिङ युनिट जस्ता सुविधाहरू छन् । यसबाहेक सोनाक्षीले भवनमा ४ वटा कार पार्किङ पनि पाएकी छिन् । कागजातका अनुसार सोनाक्षीको घरमा १,६५३.६७ स्क्वायर फिटको टेरेस पनि छ ।
नायिकाको यो नयाँ घरबाट महिम खाडी र बान्द्रा वरली सी लिंकको दृश्य देखिन्छ । यसअघि सोनाक्षीले मार्च २०२० मा बान्द्रामा आफ्नो पहिलो अपार्टमेन्ट किनेकी थिइन्, जसको मूल्य करिब १४ करोड भारु थियो ।
