काठमाडौंँ । विवादमा परेको चलचित्र ‘एक भगवत् गीता’ ले आज सेन्सर सिफारिस पाउने भएको छ ।
सेन्सर सिफरिसका लागि नामको अगाडि एक र बीचमा ड्यास राखेर निर्माण युनिटले नाम सच्याएपछि चलचित्र विकास बोर्डले आज सेन्सर सिफारिस दिनलागेको बोर्डका प्रवक्ता केएल बुढाथोकीले जानकारी दिए ।
निर्माण टिमले फिल्मको नामको अगाडि एक र बीचमा ड्यास् राख्ने बताएपछि धार्मिक संघ संस्थाहरु फिल्म रिलिज गर्न दिने सहमतिमा जुटेको बताउदै उनले भने, ‘हामी फिल्मलाई सेन्सर सिफरिस नदिने पक्षमा कहिल्यै थिएनौ र छैनौ पनि । बोर्डमा बिभिन्न धार्मिक संस्थाले निवेदन दिएर विवाद निम्त्याएका कारण सकभर मिलाएर लैजान केही समय अलमल भएको हो । दुबै पक्षको सहमतिबाट आज सेन्सर सिफरिस हुन्छ ।’
केही दिन अगाडि बिभिन्न धार्मिक संस्थाहरुले चलचित्रको नाम ‘भगवत गीता’ राखेर धर्ममाथि प्रहार गरेको भन्दै नाम परिवर्तनको माग गर्दै बोर्डमा निवेदन दिएका थिए । निवेदनपछि बोर्डले दुबै पक्षसहितको छलफलबाट विवाद मिलाउन भन्दै सेन्सर सिफरिस रोकेको थियो ।
आइतबार बोर्ड, निर्माण पक्ष र धार्मिक संघ–संस्थाले बोर्डमा नै संयुक्त पत्रकार सम्मेलन समेत गर्ने तयारी गरेका हुन् । फिल्म २९ भदौ अर्थात अगामी शुक्रबारबाट देशभर प्रदर्शनमा आउँदैछ ।
झरना थापा निर्देशित चलचित्रमा विपिन कार्की, सुहाना थापा र धीरज मगरलगायतका कलाकारले अभिनय गरेका छन् ।
