एजेन्सी । एसिया कप–२०२३ को सुपर–४ चरणको पहिलो खेलमा साविक विजेता श्रीलंका विजयी भएको छ । शनिबार श्रीलंकाले बंगलादेशलाई २१ रनले पराजित गरेको हो ।
सुपर–४ मा बंगलादेशको यो दोस्रो हार हो । पहिलो खेलमा बंगलादेश पाकिस्तानसँग पराजित भएको थियो ।
कोलम्बोको आर प्रेमदासा रंगशालामा टस जितेर बंगलादेशले पहिले बलिङ रोजेपछि ब्याटिङमा उत्रिएको श्रीलंकाले निर्धारित ५० ओभरमा ९ विकेट गुमाएर २५७ रन बनाएको थियो । जवाफमा बंगलादेशको टोली ४८.१ ओभरमा २३६ रनमा अलआउट भयो ।
योसँगै सुपर ४ मा लगातार दुई खेलमा पराजित भएको बंगलादेशको अब फाइनल पुग्ने सम्भावना लगभग सकिएको छ ।
पहिलो खेलमा पाकिस्तानसँग पराजित भएको बंगलादेश दोस्रो खेलमा श्रीलंकासँग २१ रनले स्तब्ध भयो । अब सुपर फोरको अन्तिम खेलमा उसले भारतसँग खेल्ने छ ।
भारतसँग जित निकाल्दा पनि बंगलादेशको फाइनल खेल्ने सम्भावना बाँकी हुने छैन । सुपर फोरमा भारतले एक खेल पनि खेलेको छैन भने पाकिस्तान र श्रीलंकाले एक–एक खेल खेल्दै २–२ अंक जोडेका छन् ।
श्रीलंकाले पहिला ब्याटिङ गर्दै निर्धारित ओभरमा ९ विकेट गुमाएर २५७ रन बनायो । श्रीलंकाका सदिरा समरबिक्रमाले ९३ रनको उत्कृष्ट पारि खेले । यसैगरी कुशल मेन्डिस ५० रन बनाएर आउट हुँदा पथुम निसनकाले ४० रन जोडे ।
कप्तान डासुन सनकाले २४ तथा दिमुथ करुणारत्नेले १८ रनको पारि खेले । बंगलादेशका तक्सिन अहमद र हसन महमुदले तीन तीन विकेट लिए । सइफुल इस्लामले २ विकेट लिए ।
२५८ रनको जवाफी लक्ष्यसहित मैदान उत्रिएको बंगलादेश ४८.१ ओभरमा २३६ रनमा अलआउट भयो । बंगलादेशलाई रोक्ने क्रममा महेश तिक्षणा र महिषा पथिरानाले तीन तीन विकेट लिए । बंगलादेशका तोहिड ह्रिदोले सर्वाधिक ८२ रनको पारि खेल्दा मुस्फिकुर रहिमले २९ रन जोडेका थिए । यसैगरी मेहदी हसनले २८ तथा मोहमद नइमले २१ रन जोडेपनि टोलीलाई जिताउन सकेनन् ।
