बेइजिङ । नेकपा (एमाले)का महासचिव शंकर पोखरेलले चिनियाँ नेताहरूलाई विश्व शान्ति स्थापनाको लागि दक्षिण एसियामा गरिबी निवारण कार्यक्रम र परियोजना सञ्चालन गर्न सुझाव दिनुभएको छ ।
विश्व र दक्षिण एसियामा स्थायी शान्ति स्थापनामा चीनको भूमिका नेतृत्वदायी हुने उल्लेख गर्नुहुँदै त्यसका लागि चीनले गरिबी निवारणका लागि काम गर्नुपर्नेमा जोड दिनुभएको हो ।
बेइजिङस्थित चिनियाँ कम्युनिष्ट पार्टीको केन्द्रीय विदेश विभागमा शुक्रबार आयोजित अन्तर्क्रिया कार्यक्रममा महासचिव पोखरेलले चीनको सहयोगमा निर्माण भएको पोखरा अन्तर्राष्ट्रिय विमानस्थल र चिनियाँ निर्माण व्यवसायीहरूले बनाएको गौतम बुद्ध अन्तर्राष्ट्रिय विमानस्थलबाट चीनको सिधा उडानका लागि आग्रह गर्नुभयो ।
उहाँले नेकपा (एमाले)का अध्यक्ष केपी शर्मा ओली नेतृत्वको सरकारले १० वटा औद्योगिक क्षेत्रहरू तोकेर देशलाई औद्योगीकरणमा लैजाने योजना बनाएको जानकारी दिनुहुँदै चिनियाँ उद्योगीहरूलाई नेपालमा लगानीका लागि आग्रह पनि गर्नुभयो ।
महासचिव पोखरेलले चिनियाँ कम्युनिष्ट पार्टीका महासचिव राष्ट्रपति सी जिनपिङको नेतृत्वमा नयाँ युगका लागि चिनियाँ विशेषतासहित समाजवाद स्थापनाका लागि सफलतापूर्वक अघि बढेको देख्दा खुशी लागेको बताउनुभयो ।
उहाँले भन्नुभयो–महासचिव सीको नेतृत्वमा चिनियाँ विशेषतासहितको समाजवाद स्थापनामा चीन सफलतापूर्वक अघि बढेको देख्दा हामीलाई खुशी लागेको छ ।
उहाँले नेकपा (एमाले)ले पनि माक्र्सवादको नयाँ सिर्जनात्मक अभ्यास गरिरहेको जानकारी दिनुहुँदै चिनियाँ कम्युनिष्ट पार्टीले गरेको अभ्यास र एमालेले गरेको अभ्यासको आदानप्रदानमा जोड दिनुभयो । उहाँले भन्नुभयो– दुबै पार्टीले गरेको अनुभव र अभ्यासको आदानप्रदान जरूरी छ । त्यसले भबिष्यमा दुई पार्टीबीचको सम्बन्धले नयाँ उचाइ प्राप्त गर्नेछ ।
महासचिव पोखरेलले नेकपा (एमाले)लाई बलियो राष्ट्रिय शक्ति बनाउने लक्ष्यसहित मिसन ग्रासरुट अभियानपछि मिसन–२०८४ अभियान चलाइरहेको जानकारी दिनुभयो । उहाँले आगामी २०८४ सालमा नेकपा (एमाले)लाई बहुमतसहितको पार्टी निर्माणको योजनासहित काम गरिरहेको बताउनुभयो ।
एमाले सबैभन्दा संगठन भएको पार्टीः पिङ
कार्यक्रममा चिनियाँ कव्यवस्थित म्युनिष्ट पार्टी विदेश विभागका दक्षिण एसिया व्युरोका डाइरेक्टर जनरल पिङ सिउपिनले नेकपा (एमाले) सँग चिनियाँ कम्युनिष्ट पार्टीको गहिरो र घनिष्ठ सम्बन्ध रहेको उल्लेख गर्दै इमानदारीसाथ गहिरो सम्बन्ध जारी राख्ने बताउनुभयो ।
उहाँले महासचिव पोखरेलको उच्चस्तरीय भ्रमणलाई चिनियाँ कम्युनिष्ट पार्टीले उच्च महत्व दिएको बताउनुभयो । उहाँले भन्नुभयो–महासचिवज्यूको भ्रमणलाई चिनियाँ कम्युनिष्ट पार्टीले उच्च महत्व दिएको छ । त्यसको अनुभूति तपाईहरूले गर्नुभयो भन्ने हाम्रो विश्वास छ ।
नेता पिङले सबैभन्दा व्यवस्थित संगठन भएको पार्टीको रूपमा एमालेलाई पाएको समेत बताउनुभयो । उहाँले दुई पार्टीबीचको अनुभव र विचार नियमित रूपमा आदानप्रदानमा जोड दिनुभयो ।
महासचिव पोखरेल नेतृत्वको उच्चस्तरी भ्रमण दल बिहीबार साँझ छोङछिङबाट बेइजिङ आइपुगेको हो । छोङछिङमा महासचिव पोखरेलले चिनियाँ कम्युनिष्ट पार्टीका पोलिटव्यूरो सदस्य युआन जियाजुनलगायतका नेताहरूसँग भेट गर्नुभएको थियो ।
बेइजिङमा चिनियाँ कम्युनिष्ट पार्टीका विदेश विभाग प्रमुखलगायतका उच्च नेताहरूलाई भेट्ने कार्यक्रम रहेको छ ।
