एजेन्सी । महेन्द्र सिंह धोनी आफ्नो परिवारसँग छुट्टी मनाउन अमेरिकामा छन् । बिहीबार अमेरिकी पूर्व राष्ट्रपति डोनाल्ड ट्रम्पले उनको लागि गल्फ म्याच आयोजना गरेका थिए । दुवैले करिब एक घण्टा खेल खेले ।
धोनी–ट्रम्पको भिडियो र तस्बिर सामाजिक सञ्जालमा भाइरल भइरहेको छ । अन्तर्राष्ट्रिय क्रिकेटबाट सन्यास लिएपछि धोनीलाई प्रायः गल्फ खेलिरहेको देखिन्छ ।
धोनी सेप्टेम्बर ७ मा भारतीय समय अनुसार दिउँसो १२ बजे अल्कारेज र अलेक्जेन्डर ज्वेरेभबीचको युएस ओपनको क्वार्टरफाइनल खेल हेर्न पनि आएका थिए । यसको भिडियो र फोटो पनि भाइरल भएको थियो ।
धोनी आफ्ना केही साथीहरूसँग अल्कारेजको पछाडि बसेका थिए । अफिसियल ब्रोडकास्टरले पनि धोनीको भिडियो आफ्नो सोशल मिडिया ह्यान्डलमा सेयर गरेको छ । भिडियोमा धोनी केही मानिससँग कुरा गर्दै हाँसेको देखिएका छन् ।
धोनीले आफ्नो कप्तानीमा चेन्नई सुपर किंग्सलाई ५ पटक आईपीएल उपाधि जिताएका छन् । उनको कप्तानीमा चेन्नई सुपर किंग्सले २०२३ को सिजन समेत जितेको थियो । आईपीएलमा चेन्नईको यो पाँचौं उपाधि हो । धोनीले सन् २०२० को अगस्ट १५ मा अन्तर्राष्ट्रिय क्रिकेटबाट सन्यासको घोषणा गरेका थिए । अहिले उनी आईपीएलमा चेन्नईबाट मात्र खेलिरहेका छन् ।
